Disa nga ngjarjet, njerëzit dhe datat më me ndikim në historinë botërore që kanë shënuar ditën e sotme, 25 janar, shkruan Kosova Post.
1928 – Lindi në Mamati, Eduard Shevardnadze. Shevardnadze, ishte një politikan dhe diplomat i Gjeorgjisë. Ai shërbeu si Sekretar i Parë i Partisë Komuniste Gjeorgjiane, udhëheqësi de fakto i Gjeorgjisë Sovjetike nga 1972 deri në 1985 dhe si Ministër i Punëve të Jashtme të Bashkimit Sovjetik nga 1985 deri në 1991. Shevardnadze ishte përgjegjës për vendimet kryesore që u ndërmorën në politikën e jashtme sovjetike.
1935 – Lindi Skënder Sallaku një nga aktorët tanë të humorit, ish-kampion kombëtar në mundjen klasike, autor skeçesh e parodish. Ka mbaruar Institutin e Lartë të Kulturës Fizike “Vojo Kushi” dhe ka kryer një kualifikim një vjeçar në Kinë, pranë cirkut të Pekinit. Fillimisht filloi punë si profesionist në Estradën e Kufirit, më pas si klloun akrobatik në cirk, duke dhënë një kontribut të papërsëritshëm në ecurinë e këtij profili sa të vështirë aq edhe të bukur. Skënder Sallaku është vlerësuar me titujt “Artist i Merituar”, “Artist i Popullit” dhe “Mirënjohja e Qytetit të Tiranës”.
1947 – Vdes në Palm Island, në moshën 48 vjeçare, Al Capone. Al Capone, nganjëherë i njohur me nofkën “Scarface”, ishte një gangster amerikan dhe biznesmen që arriti famën gjatë epokës së Prohibicionit si bashkëthemelues dhe shefi i Mafias në Chikago. Mbretërimi i tij shtatë vjeçar si shefi i krimit përfundoi kur ai u burgos në moshën 33 vjeçare. Pas vdekjes ai, do të bëhej i njohur, edhe nëpërmjet filmave.
1949 – Prezantohen për herë të parë çmimet Emmy. Ndërsa vendi i organizimit të eventit ishtë Hollywood Athletic Club. Çmimet Emmy, janë një festival amerikan që vlerëson përsosmërinë në industrinë e televizionit. Dy ceremonitë që marrin më shumë mbulim mediatik janë çmimet Primetime Emmy dhe Daytime Emmy Awards. Emmy janë një nga katër evenimentet të SHBA, së bashku me Tony, Oscar, dhe Grammy.
1961 – Në Uashington, Presidenti John F. Kennedy jep konferencën e parë të drejtpërdrejtë të lajmeve televizive presidenciale. Duke filluar që nga viti 1961, moda e të bërit lajm në konferencat për shtyp, në radhët e Presidentëve amerikanë, u përhap në mënyrë të shpejtë. Në këto konferenca, zakonisht Presidenti flet, dhe më pas iu përgjigjet pyetjeve të gazetarëve.
1969 – Kapiteni i ushtrisë braziliane Carlos Lamarca dezerton në mënyrë që të luftojë kundër diktaturës ushtarake, duke marrë me vete armë, dhe një sasi të konsiderueshme municionesh. Ai ishte një pjesë e Frontit Popullor Revolucionar dhe u bë, së bashku me Carlos Marighellan, një nga drejtuesit e luftës së armatosur kundër diktaturës ushtarake në Brazil. Lamarca u vra dy vjet më pas nga ushtria braziliane në Pintada.
1971 – Idi Amin drejton një grusht shteti që rrëzon Milton Oboten, dhe më pas bëhet Presidenti i Ugandës. Amin, ishte një oficer ushtarak Ugandan, që shërbeu si President i Ugandës nga 1971 deri në 1979. E njohur gjerësisht si “Kasapi i Ugandës”, ai konsiderohet një nga despotët më të egër në historinë e Afrikës. Obote, do të rikthehej në pushtet vetëm pas tetë vitesh, mërgimi politik.
1998 – Gjatë një vizite historike në Kubë, Papa Gjon Pali II kërkon reforma politike dhe lirimin e të burgosurve politikë ndërsa dënon përpjekjet e SHBA, për të izoluar vendin. Vizita e Papa Gjon Palit të II në ishullin komunist, dha një shenjë të madhe që Havana zyrtare, kishte filluar që të liberalizonte ndjeshëm, karakterin e regjimit të saj. Kjo do të ishte vizita më e rëndësishme e Papës në Kubë.
2011 – Vala e parë e revolucionit egjiptian fillon në të gjithë vendin, e shënuar nga demonstratat në rrugë, mitingjet, akte të mosbindjes civile, trazirat, greva pune dhe përplasje të dhunshme. Revoltat, për rrëzimin e qeverisë së Hosni Mubarak-ut, zgjatën 18 ditë dhe netë. Gjatë këtyre protestave, humbën jetën afro 1000 civilë, si dhe me mijëra të tjerë u plagosën. Si rezultat i revoltave, Mubarak dha dorëheqjen.
