Kanadaja ka nisur të premten një fushatë reklamuese në 12 shtete amerikane për të kundërshtuar tarifat e vendosura nga ShBA, sipas ministres së Jashtme kanadeze, Mélanie Joly.
“Ne kemi vendosur tashmë tarifa kundërpërgjigjëse në vlerë prej 60 miliardë dollarësh mbi mallrat amerikane”, tha Joly në një intervistë për CNN.
Duke theksuar se tarifat “janë një taksë ndaj amerikanëve që punojnë shumë”, ajo argumentoi se “ato do të sjellin rritje çmimesh për qytetarët amerikanë, si në karburant, ashtu edhe në blerjet ushqimore.”
“Po nisim një fushatë reklamuese sot në 12 shtete të ndryshme. Kanadezët po dërgojnë mesazhin se në një luftë tregtare nuk ka fitues. Do të ketë humbje vendesh pune në të dyja anët e kufirit”, tha ajo.
Fushata përfshin reklama të afishuara përgjatë autostradave kryesore në Florida, Nevada, Georgia, New Hampshire, Michigan dhe Ohio.
Një postim në Instagram nga Ambasada Kanadeze në ShBA bëri të ditur se reklamat do të lexojnë: “Tarifat janë një taksë ndaj amerikanëve që punojnë shumë.”
“E dimë mirë që këto janë shtete konservatore, por po e bëjmë këtë sepse besojmë se duhet të përcjellim një mesazh për popullin amerikan që të kuptojë çfarë është në rrezik”, shtoi Joly, duke u bërë thirrje qytetarëve amerikanë të flasin me përfaqësuesit e tyre në Kongres.
E pyetur nëse Kanadaja do ta shtyjë zbatimin e tarifave të kundërta, Joly tha se vendi vendosi të pezullojë masat në vlerë prej 90 miliardë dollarësh pas vonesës së tarifave nga Shtëpia e Bardhë, por mbetet i gatshëm për të vepruar.
“Për shkak të një pezullimi të një urdhri ekzekutiv nga Shtëpia e Bardhë, vendosëm ta pezullojmë pjesën tjetër të tarifave”, deklaroi ajo.
Joly iu përgjigj gjithashtu komenteve të presidentit amerikan Donald Trump, i cili e quajti Kanadanë “shteti i 51-të” dhe “një nga vendet më të liga”.
“Retorika që vjen nga Shtëpia e Bardhë është, si të them… absurde sa i përket aneksimit dhe krejtësisht e papranueshme”, tha Joly.
Duke theksuar se Kanadaja po forcon lidhjet me Evropën dhe Mbretërinë e Bashkuar, ajo shtoi: “Ne nuk e kemi nisur këtë luftë tregtare. Ne kurrë nuk e kemi kërkuar atë.”
Tarifat e vendosura nga Trump vazhdojnë të shkaktojnë pasiguri, pasi Kanadaja është ndër vendet specifikisht të shënjestruara nga politikat e tij tregtare, shkruan ,trtglobal.abalkan.Presidenti amerikan shpalli tarifa prej 25% mbi mallrat kanadeze dhe masa të tjera, por e shtyu zbatimin e tyre deri më 2 prill.
