Katari është “shumë optimist” se një zgjatje e armëpushimit mes Izraelit dhe Hamasit do të shpallet në orët e ardhshme, pas lirimit të pritshëm të grupit të gjashtë pengjeve, tha Majed Al-Ansari, zëdhënësi i Ministrisë së Jashtme të Katarit.
Raportohet nga mediat se presioni për zgjatjen e marrëveshjes për armëpushim erdhi edhe nga ndërmjetësuesit ndërkombëtarë.
Ndërsa kur u pyet për detajet mbi kushtet dhe sigurinë e pengjeve të mbetura, ai tha se negociatat po ndodhnin në një “ambient pozitiv”, ndërsa vuri në dukje se po flitet për një zonë lufte me komplikime në terren.
Ai theksoi gjithashtu se lirimi i meshkujve të rritur dhe ushtarëve të Forcave të Mbrojtjes së Izraelit, kanë qenë tema diskutimi dhe se ata mund të lirohen në të ardhmen e afërt.
“Ne i kemi dhënë përparësi për lirim atyre që janë më të rrezikuar, duke i vendosur në vend të parë gratë dhe fëmijët. Ne po shkojmë drejt lirimit të civilëve të tjerë dhe më pas do të ketë diskutime më të gjata në lidhje me lirimin e ushtarëve”, shtoi ai.
