Këto ditë zyrtarët e KEDS-it ishin në rajonin e Mitrovicës, ku dhuruan dhjetëra kompjuterë për nxënësit e shkollave fillore, “Jashar Begu”, “Xhevat Jusufi” dhe “Dëshmoret e Kaçandollit.
Ky donacion do t’i ndihmojë të rinjtë e këtyre shkollave që të kenë qasje në botën teknologjike dhe atë informative që do të ndikojë në rritjen e cilësisë së mësimit dhe edukimit.
Stafi i shkollës “Jashar Begu” u shprehën shumë të kënaqur me donacionin e KEDS-it. Drejtoresha e kësaj shkolle, Elmaze Hasani, tha se ky është donacioni më i madh dhe më i nevojshëm që nxënësit e shkollës së tyre kanë marrë ndonjëherë.
“Shkolla jonë ka mbetur disi e harruar gjithmonë kur ka qenë rasti i ndarjes së donacioneve. Ky donacion i sotshëm është shumë i mirëseardhur për neve dhe për këtë falënderoj shumë kompaninë KEDS-in për këto pajisje dhe për përkrahjen në procesin mësimor të nxënësve tonë”, tha ajo.
Edhe nxënësit u shprehën të entuziazmuar dhe shumë lumtur për kompjuterët e dhuruar nga KEDS-i, që tani e tutje do t’i përdorin për disa lëndë mësimore.
Një falënderim tjetër për KEDS-in erdhi edhe nga këshilli i shkollës “Xhevat Jusufi”, në Bare të Mitrovicës.
“Falënderojmë tej mase KEDS-in për donacionin që e shohim më se të nevojshëm për shkollën tonë, sepse do t’i përdorim për qëllime të mësimdhënies për të gjithë nxënësit dhe mësimdhënësit”, tha drejtori i kësaj shkolle, Ismajl Hajdari.
Deri më tani kompania ka dhuruar qindra kompjuterë dhe shumë libra për disa shkolla fillore dhe organizata të ndryshme të Kosovës. Përfitues direkt janë mijëra nxënës dhe mësues.
Në kuadër të Përgjegjësisë Shoqërore të Korporatës, KEDS-i gjithmonë ka kontribuar përmes donacioneve të ndryshme dhe programeve në avancimin e edukimit të brezave të rinj në Kosovë. /Kosova Post/
