Në një përshkallëzim të dukshëm të luftës tregtare midis dy ekonomive më të mëdha të botës, Kina ka kërkuar nga linjat e saj ajrore të mos blejnë më avionë, pajisje apo pjesë këmbimi nga kompania amerikane Boeing. Sipas agjencisë Bloomberg, kjo është një masë ndëshkuese ndaj tarifave të reja të vendosura nga ish-presidenti amerikan Donald Trump ndaj produkteve kineze.
Kina tashmë kishte rritur me 125% tarifat ndaj produkteve amerikane, duke e bërë blerjen e avionëve dhe pjesëve nga SHBA të papërballueshme për kompanitë ajrore kineze. Në këtë kontekst, autoritetet kineze po shqyrtojnë mundësinë për të ndihmuar financiarisht linjat që kanë marrë avionë Boeing me qira, pasi kostoja e tyre është rritur ndjeshëm.
Tregjet kanë reaguar menjëherë ndaj kësaj goditjeje. Aksionet e Boeing ranë me 4.6% këtë të martë, duke u shtuar humbjeve të këtij viti që kapin tashmë 10%, të ndikuara edhe nga incidentet dhe ndalimi i përdorimit të disa avionëve 737 MAX 9.
Rreth 10 avionë Boeing 737 MAX, që ishin të destinuar për tregun kinez, janë prekur nga vendimi i ri. Sipas të dhënave të Aviation Flights Group, China Southern Airlines, Air China dhe Xiamen Airlines kishin porositur secila nga dy avionë. Megjithatë, disa prej këtyre kontratave janë nënshkruar para hyrjes në fuqi të tarifave, ndaj mund të mos preken.
Pavarësisht kësaj goditjeje, Kina përbën një pjesë të vogël të shitjeve të Boeing – vetëm 130 nga 5.600 avionë të parashikuar për vitin 2024. Por nëse edhe vende të tjera ndjekin shembullin e Kinës, pasojat për Boeing mund të jenë shumë më të mëdha.
Ndërkohë, lufta tregtare mes SHBA dhe Kinës vazhdon në hije. Xi Jinping ka theksuar se të dyja palët kanë shumë për të humbur, shkruan A2CNN. Në një hap të papritur, Trump javën e kaluar hoqi tarifat për pajisje elektronike si telefonat dhe kompjuterët, një lehtësim për kompani si Apple dhe Samsung që prodhojnë në Azi.
