Iniciativa e të Rinjve për të Drejtat e Njeriut (YIHR) ka njoftuar sot se Komiteti i OKB-së për Personat e Zhdukur me Forcë, i ka bërë thirrje qeverisë së Serbisë të zbatojë Rezolutën e Asamblesë së Përgjithshme të Kombeve të Bashkuara për gjenocidin në Srebrenicë dhe të ndryshojë legjislacionin kombëtar për të sanksionuar mohimin e krimeve të luftës dhe lavdërimin e kriminelëve të dënuar të luftës.
Në një njoftim për media, YIHR bëri të ditur se më 4 prill të këtij viti, Komiteti publikoi raportin mbi Serbinë me një sërë rekomandimesh, përfshirë edhe ato të propozuara nga vetë Iniciativa më 12 mars.
Sipas Institutit për Personat e Zhdukur të Bosnje dhe Hercegovinës, ende po kërkohen mbi 800 persona të zhdukur nga zona e mbrojtur e Srebrenicës. Ndërsa sipas Komitetit Ndërkombëtar për Personat e Zhdukur, mbi 11.000 persona konsiderohen ende të zhdukur në territorin e ish-Jugosllavisë.
Komiteti gjithashtu i kërkoi Serbisë të ndryshojë Ligjin për të Drejtat e Veteranëve, Invalidëve të Luftës, Invalidëve Civilë të Luftës dhe Familjeve të tyre, në mënyrë që të gjitha viktimat e konflikteve të armatosura të njihen si viktima, pa diskriminim.
Ndër rekomandimet e raportit është edhe miratimi i projektligjit për të drejtat e personave të zhdukur dhe familjeve të tyre, duke garantuar pjesëmarrjen e plotë të organizatave të shoqërisë civile dhe shoqatave të familjarëve të viktimave në shqyrtimin e tij.
Komiteti theksoi gjithashtu rëndësinë e qasjes në arkiva për të ndihmuar në hetimin e rasteve të zhdukjes.
Një nga pikat kyçe të raportit është edhe rekomandimi për bashkëpunim më të ngushtë midis Serbisë dhe Kosovës, për të kapërcyer pengesat që e bllokojnë zbatimin e Deklaratës për Personat e Zhdukur të majit 2023, për të cilën ishin dakorduar presidenti serb Aleksandar Vuçiq dhe kryeministri në dorëheqje i Kosovës, Albin Kurti.
Komiteti shprehu shqetësimin për mungesën e përkujtimit të viktimave të zhdukjeve të dhunshme që nuk i përkasin nacionalitetit serb në Serbi.
Autoriteteve në Serbi iu rekomandua gjithashtu që ekspozitat muzeale, memorialet dhe përkujtimet për luftërat e viteve ’90 të jenë gjithëpërfshirëse dhe të reflektojnë përvojat e të gjitha viktimave të zhdukjeve të dhunshme, pa dallim etnie apo përkatësie kombëtare. /Danas
