Në kuadër të aktiviteteve për Ditën e Mësuesit, kryetari i Prishtinës, Përparim Rama, dhe ambasadori i Shqipërisë në Kosovë, Petrit Malaj, vizituan shkollën “Mehmet Gjevori”, për të nderuar kontributin e pedagogut nga Shqipëria. Aty u ndanë edhe mirënjohje për mësimdhënësit e dalluar, duke vlerësuar rolin e tyre në edukimin e brezave të rinj.
Në shënim të 7 Marsit – Ditës së Mësuesit, kryetari i Prishtinës, Përparim Rama, bashkë me ambasadorin e Shqipërisë në Kosovë, Petrit Malaj, vizituan shkollën “Mehmet Gjevori”, në kryeqytet, shkollë që mban emrin e pedagogut nga Shqipëria, I cili u vlerësua lartë për kontributin e tij në arsimin në Kosovë. Përveç nxënësve e mësimdhënësve, aty pjesëmarrës ishin edhe familjarë të Gjevorit.
Përparim Rama, kryetar i Prishtinës për Mehmet Gjevorin tha se ka qenë edukator që ka formësuar brez pas brezi. “Është shkrimtari që i dha abetaren e parë në Kosovë”, tha Rama.
Petrit Malaj, ambasador i Shqipërisë në Kosovë, tha se & Marsi është një ditë që simbolizon përkushtimin dhe dashurinë e pamasë për dijen. “Jam shumë i kënaqur që sot, më 7 Mars, në këtë ditë të shënuar për arsimin dhe për kulturën tonë kombëtare të jem këtu mes jush në një institucion që mban emrin e njërit prej mësuesve më të ndritur që ka njohur historia jonë, Mehmet Gjevorin”, tha ambasador Malaj, rtk.
Në kuadër të aktiviteteve për 7 Mars, Komuna e Prishtinës mblodhi në sallën e Kuvendit Komunal, mësimdhënës e drejtorë të shkollave të ndryshme kryeqytetit.
