Kryetari i Kuvendit të Kosovës, Glauk Konjufca ka reaguar së fundmi me rastin e shënimit të dy vjetorit të agresionit rus kundër Ukrainës, përcjell KosovaPost.
Ai ka thënë se Republika e Kosovës shpreh mbështetjen dhe solidaritetin ndaj Ukrainës kundër sulmit të Rusisë.
Kosova është e përkushtuar për lirinë dhe sovranitetin, duke ndarë synimet për integrim në NATO dhe BE. Liria për Ukrainën, ishin disa nga fjalët e Konjufcës.
Postimi i plotë:
Këto dy vite që nga sulmi i Rusisë mbi Ukrainën, shënojnë fazën kur në mënyrë të qartë botës iu ofruan dy propozime, njëri që thërret për radhitje nën emrin e lirisë, dinjitetit dhe demokracisë, e tjetri që dëshiron nënshtrim, pushtim, shfrytëzim dhe krime kundër njerëzimit.
Republika e Kosovës është krenare që angazhohet fuqishëm, pa mëdyshje dhe ambiguitet, në anën e drejtë të historisë, duke iu bashkuar asistencës dhe solidaritetit të botës demokratike ndaj Ukrainës, që ashtu si ne aspiron integrim në NATO dhe Bashkim Evropian.
Në këto dy vite, Rusia e Vladimir Putinit ka bërë çmos për ta pushtuar përfundimisht Ukrainën, duke mos ia dalë, por ka angazhuar edhe satelitët e saj në Evropë për të mbjellë destabilitet, pasiguri, shpërqëndrim, luftë dhe përçarje. Me një Serbi të gatshme për t’ shtyrë planet e Putinit në rajonin tonë dhe Evropë, mbështetja dhe angazhimi ynë për fitoren e Ukrainës bëhet edhe më kuptimplotë.
Liria e popujve, sovraniteti i vendeve, është goditja më e rëndë ndaj tiranëve dhe tiranive të tyre.
Liri Ukrainës dhe popullit të saj!
