Derisa po bëhen përgatitjet për fillimin e numërimit të votave për kandidatët të cilët në zgjedhjet e 9 shkurtit garuan për ulëse në Kuvendin e Kosovës, Komisioni Qendror i Zgjedhjeve nuk ka bërë përditësim të të dhënave nga e hëna kur i fundit ishte në ora 19: 10 minuta.
Nga 2533 vendvotime sa pati Kosova të dielën e 9 shkurtit, rezultati në faqen zyrtare të KQZ-së është procesuar për 2512 prej tyre. Pra, ende nuk është procesuar rezultati edhe për 21 vendvotime.
Nga KQZ-ja nuk kanë dhënë sqarime pse ky rezultat preliminar ende nuk ka arritur në 100 për qindëshin e vendvotimeve dhe qysh nga dje ka mbetur në 99.17 për qind të rezultatit të procesuar.
Gjilani është një nga komunat që aktualisht procesimi i rezultateve ka mbetur në 93.80 për qind. Klina në 96.77, Leposaviqi në 88.46, Shtërpca në 94, 12,Mitrovica e veriut në 95.83 për qind, Deçani 98 për qind e Mitrovica e jugut mbi 99 për qind ndërkaq në komunat tjera rezultati i procesuar në faqen e KQZ-së është nga 100 për qind nga të gjitha vendvotimet e secilës prej tyre.
Aktualisht sipas rezultatit preliminar në bazë të të dhënave të KQZ-së, gjithmonë referuar orës 19 e 10 minuta të së hënës, Vetëvendosje është partia e parë me 40. 83 për qind të votave, PDK-ja e dyta me 22.15 për qind, Lidhja Demokratike e Kosovës me 17, 59 për qind e AAK- Nisma bashkë me koalicionin e tyre me 7,47 për qind të votave.
