Kryeministri i ri i Grenlandës, Jens-Frederik Nielsen, ka mohuar deklaratat e ish-presidentit amerikan, Donald Trump, se Shtetet e Bashkuara synojnë të marrin kontrollin e territorit të gjerë arktik.
“Presidenti Trump thotë se Shtetet e Bashkuara po marrin Grenlandën. Më lejoni të jem i qartë: Shtetet e Bashkuara nuk do ta marrin këtë. Ne nuk i përkasim askujt tjetër. Ne e vendosim vetë të ardhmen tonë,” deklaroi Nielsen.
Gjatë një interviste për NBC, Trump tha se ai synon të marrë Grenlandën dhe se ky objektiv mund të arrihet edhe pa forcë ushtarake, por shtoi: “Unë nuk heq asgjë nga tavolina.” Ai pranoi gjithashtu se kishte pasur bisedime reale për aneksimin e territorit gjysmë-autonom danez.
Nielsen, i cili ka shërbyer më parë si ministër i industrisë dhe mineraleve, u betua si kryeministër të premten, duke u bërë lideri më i ri i vendit. Në konferencën e tij të parë për shtyp në Nuuk, ai bëri thirrje për unitet politik përballë presioneve të jashtme, duke theksuar: “Në një kohë kur ne si popull jemi nën presion, duhet të qëndrojmë së bashku.”
Deklarata e tij vjen pak orë para mbërritjes së një delegacioni të lartë amerikan në ishull, i kryesuar nga zëvendëspresidenti JD Vance. Vance kritikoi administrimin danez mbi Grenlandën, duke thënë: “Danimarka nuk ka bërë një punë të mirë për popullin e Grenlandës. Investimet kanë qenë të pamjaftueshme, si për zhvillimin ashtu edhe për sigurinë e këtij territori të jashtëzakonshëm., shkruan euronews.al. “Kritikat e SHBA-së shkaktuan reagimin e Ministrit të Jashtëm danez, Lars Løkke Rasmussen, i cili u shpreh i zhgënjyer nga qëndrimi i Uashingtonit: “Ne jemi të hapur ndaj kritikave, por më lejoni të jem i sinqertë: nuk e vlerësojmë tonin me të cilin po na drejtohen. Kjo nuk është mënyra se si flitet me aleatët e ngushtë.”
