Kryeministri në detyrë i Republikës së Kosovës, Albin Kurti, mirëpriti sot fillimisht në zyrën e tij e pastaj edhe për drekë pune, Drejtorin Ekzekutiv të kompanisë Bosch Rexroth, Steffen Haack.
Gjatë takimit dhe drekës, kryeministri Kurti, i shoqëruar nga ministrja në detyrë e Industrisë, Ndërmarrësisë dhe Tregtisë, Rozeta Hajdari, i uroi mirëseardhje në Kosovë dhe vizitë të suksesshme, z. Haack, teksa e njoftoi me performancën ekonomike të vendit në katër vitet e fundit, politikat qeveritare në mbështetje të bizneseve e veçanërisht në prodhim, investimet në arsimin e lartë, sidomos në fushat STEM, dhe ofertën e përparësitë e Kosovës për të tërhequr investitorë të huaj.
Duke i dhënë theks të veçantë sektorit të Teknologjisë në vend, që ka mbi 2,000 kompani të teknologjisë dhe informacionit, ai tha se Kosova po bëhet qendra digjitale e rajonit. Sikurse kompani tjera gjermane që tashmë po zhvillojnë softuerët e tyre në Kosovë, kryeministri u shpreh i bindur që edhe Bosch Rexroth mund të përfitojë nga oferta e vendit tonë: forcë punëtore të re dhe profesionale, kosto të ulët operacionale, grante për investime në makineri, importe pa taksa për pajisje, qasje në zona moderne industriale dhe kornizë ligjore të harmonizuar me standardet e Bashkimit Evropian për të siguruar stabilitet afatgjatë të investimeve.
Me këtë rast, kryeministri ftoi drejtuesit e kompanisë Bosch Rexroth për të shqyrtuar mundësitë konkrete për investime në vendin tonë dhe shprehu gatishmërinë e tij të plotë dhe të institucioneve të Republikës së Kosovës për bashkëpunim dhe partneritet.
Drejtori Ekzekutiv, Haack bashkë me një delegacion nga kompania Bosch Rexroth po qëndron në Kosovë për një vizitë disa ditore, ku përveç drejtuesve institucionalë, po takon edhe komunitetin start up të bizneseve si dhe komunitetin akademik. Bosch Rexroth ka përfaqësi në afër 100 vende të botës, ka rreth 32,600 bashkëpunëtorë, dhe në vitin e kaluar ka gjeneruar të ardhura prej shitjeve në vlerë 6.5 miliardë euro.
