Kryeministri Edi Rama iu përgjigj sot live pyetjeve të adresuara në platformat sociale nga qytetarët.
I pyetur nga qytetarët lidhur me largimin e të rinjve nga vendi, Rama u shpreh se, “ky është një trend historik që e kanë kaluar të gjitha vendet e tjera”.
Lidhur me realizimin e premtimeve, kreu i qeverisë u shpreh se, “unë kam realizuar shumë çka kam premtuar dhe deri në fund do të realizoj të gjitha ato që kam premtuar”.
“Shumëçka është realizuar dhe çka mbetet për t’u realizuar do të realizohet. Kjo është shumë e thjeshtë dhe arsyeja pse unë jam këtu dhe do të jem këtu dhe për ca kohë është pikërisht kjo, që të përmbush një mision që kam nisur së bashku me shumicën e shqiptarëve dhe që jemi shumë afër realizmit të atij misioni që është një mision historik, epokal i vendosjes së flamurit tonë kombëtar në oborrin e familjes evropiane”, tha Rama.
Një emigranti nga Durrësi, i cili shprehet se “u kalbëm në emigrim”, Rama i sugjeron të kthehet në atdhe.
“Kthehu, siç po kthehen ata që vendosën të kthehen dhe nuk janë të zhgënjyer përkundrazi ndihen të lehtësuar. Kthehu”, tha Rama.
Një qytetari, i cili i shkruan për humbje në 11 maj, Rama i tha “do t’ju dhembë 11 maji”.
“Mos e cysni se do të dilni shumë të trishtuar nga 11 maji. Lëreni procesin të bëjë të vetën. Ju keni të drejtën të mendoni ashtu siç mendoni, mbrapsht, por është e drejta juaj”, tha ai.
“Keni të drejtën të ëndërroni, keni të drejtën të imagjinoni se më 11 maj do të keni popullin me vete, gjë që s’ju ndodh për shumë arsye që janë shumë të thjeshta fare, por për një arsye shumë të madhe se ju me popullin dhe shumicën e popullit shqiptar nuk keni përputhje në mënyrën sesi i shikoni gjërat dhe si i kuptoni gjërat sepse populli shqiptar nuk kthehet më mbrapa dhe prisni duroni 30 ditë. 30 ditë do duroni dhe pastaj do ta shihni se kujt do t’i trokasë Noci tek dera”, u shpreh Rama.atsh.
