Kyeministri i Kosovës, Albin Kurti tha se buxheti i komunave në vitin 2024 do të jetë 742 milionë euro apo 195 më shumë sesa ishte në vitin e parë të qeverisjes, përcjell KosovaPost.
Me anë të një postimi në Facebook, Kurti shkruan se granti i përgjithshëm për komuna tani është më i larti ndonjëherë, duke shtuar se kanë zgjeruar bashkëpunimin në fushën e mjedisit ndërmjet nivelit qendror dhe atij lokal përmes “Kartës së Komunës së gjelbër dhe të qëndrueshme”.
“Buxheti i komunave në vitin 2021 ishte 547 milionë euro. Sivjet është 654 milionë. Vitin tjetër do të jetë 742 milionë euro apo 195 më shumë sesa ishte në vitin e parë të qeverisjes. Pra mbështetja jo vetëm që nuk ka munguar, por ajo vetëm sa është shtuar. Granti i përgjithshëm për komuna tani është më i larti ndonjëherë. Kemi zgjeruar bashkëpunimin në fushën e mjedisit ndërmjet nivelit qendror dhe atij lokal përmes “Kartës së Komunës së gjelbër dhe të qëndrueshme”, shkruan Kurti.
Shefi i ekzekutivit tha se anëtarësimi në organizatën ndërkombëtare Open Government Partnership, pas 10 vitesh përpjekje, e ka rreshtuar Kosovën me shtetet më demokratike në zotimin e përbashkët për qeverisje të hapur, llogaridhënëse dhe gjithëpërfshirëse.
“Në dhjetor 2021 inauguruam ngrohjen me biomasë në Komunën e Gjakovës. Ndërkaq në proces e sipër është studimi i fizibilitetit për ngrohje qendrore në gjithsej tetë komuna, në mënyrë që qytetarët të kenë ngrohje të qëndrueshme me çmim të përballueshëm.
Anëtarësimi në organizatën ndërkombëtare Open Government Partnership, pas 10 vitesh përpjekje, e ka rreshtuar Kosovën me shtetet më demokratike në zotimin e përbashkët për qeverisje të hapur, llogaridhënëse dhe gjithëpërfshirëse. Miratimi i Ligjit të Performancës do ta rrisë transparencën e komunave ndaj qytetarëve. Kurse lansimi i Platformës E-Komuna ua lehtëson qytetarëve marrjen e shërbimeve komunale”, vazhdon shkrimin Kryeministri.
Krejt në fund Kurti tha se në këto dy vite e gjysmë janë nënshkruar nënshkruar gjithsej 15 nisma për bashkëpunim ndërkomunal dhe ndërkombëtar, si dhe kanë mbështetur afër 150 projekte të ndryshme kapitale në komuna përmes programeve të Ministrisë së Administrimit të Pushtetit Lokal dhe Ministrisë për Zhvillimin Rajonal
““Ndër të tjera, në këto dy vjet e gjysmë janë nënshkruar gjithsej 15 nisma për bashkëpunim ndërkomunal dhe ndërkombëtar, kemi mbështetur afër 150 projekte të ndryshme kapitale në komuna përmes programeve të Ministrisë së Administrimit të Pushtetit Lokal dhe Ministrisë për Zhvillimin Rajonal, mbi 1500 të rinj nga 10 komuna të ndryshme kanë përfituar nga programi “Komunat për të rinj”, dhe janë ndarë 3 milionë euro për ndërtimin e shtëpive të komuniteteve jo shumicë. Për qytetarët në komuna. Për komunat e qytetarëve”, përfundon shkrimin Kurti.
