Ministria e Administrimit të Pushtetit Lokal (MAPL) ka organizuar takimin e pestë të përbashkët me kryeministrin Albin Kurti, ministritë e linjës dhe kryetarët e komunave të Kosovës, transmeton Kosova Post.
Kryeministri i Kosovës, Albin Kurti, tha se që nga takimi i fundit i formatit të tillë, lajm i mirë është organizimi i Lojërave Mesdhetare “Prishtina 2030” të cilat do të zhvillohen në dhjetë komuna të Kosovës, si dhe një të Shqipërisë.
Kurti tha se ky format shërben që përmes diskutimit të punohet për mirëqenien e qytetarëve dhe problemet e tyre të reduktohen.
“Buxheti i komunave për vitin 2024 arrinë në 742 milionë euro. Po bëhet tashmë viti i dytë radhazi që rritja e buxhetit është në përqindje dyshifrore krahasuar me vitin paraprak. Në vlerë absolute buxheti i vitit 2024 është për gati 90 milionë euro më i lartë krahasuar me vitin 2023”, theksoi Kurti.
Ai tha se investimet kapitale nga ministritë e linjës në komuna përfshijnë: autostrada, përmirësim të infrastrukturës në qendër e rrugë të reja në zona më të thella, ndriçim publik, investime në energji efiçiente, parqe, hapësira të gjelbra dhe salla sportive, rregullim të shtretërve të lumenjve, shkolla për nxënësit dhe shtëpi për personat në nevojë pa diskriminuar asnjë komunitet dhe pa përjashtuar asnjë zonë.
Kryetari i Asociacionit të Komunave të Kosovës, njëherësh kryetar i Komunës së Ferizajt, Agim Aliu, përmendi disa nga sfidat dhe kërkesat e kryetarëve të komunave për nivelin qendror të qeverisjes.
Ndër të parat, Aliu e përmendi nevojën për ndryshimin e traditës së moskonsultimit dhe qasja moskomunikuese midis nivelit qendror me komunat.
“Propozimi ynë është që mbi 100 milionë eurot e dedikuara për investime kapitale në komuna të ndahen në mënyrë të drejtpërdrejtë për komunat dhe jo përmes ministrive përkatëse për të garantuar përfundimisht asnjanësinë dhe barabartësinë për komunat në pikëpamje të zhvillimit të projekteve kapitale me financim të nivelit qendror”, theksoi Aliu.
Tutje ai tha se edhe sa u përket Lojërave Mesdhetare “Prishtina 2030”, qeveria duhet të reagojë sa më shpejtë në shpronësimin e pronave private nëpër komuna ku parashihen ndërtimet e stadiumeve, në mënyrë që mbarëvajtja e këtij organizimi ndërkombëtar të shkojë siç duhet.
Në këtë mbledhje të kryeministrit Kurti dhe ministrave të qeverisë u mbajt edhe një minutë heshtje në nderim të Heroit të Kosovës, Afrim Bunjaku, policit që u vra gjatë sulmit të një grupi të armatosur serb në veri të vendit./aa
