Kryeministri në detyrë, Albin Kurti ka kujtuar grevën e punëtorëve të 35 viteve më parë, duke e quajtur atë si më të madhen grevë të punëtorëve në Kosovë që kishte dy kërkesa, kthimin e punëtorëve shqiptarë të larguar nga puna në kundërshtim me konventat ndërkombëtare si dhe mospengimin e punës së Kuvendit dhe të Qeverisë së Kosovës, përcjell KosovaPost.
“Sot, e kujtojmë grevën e madhe të punëtorëve të Kosovës të para 35 viteve, të mbajtur më 3 shtator 1990. Atë ditë të hënë, mijëra punëtorë, studentë dhe qytetarë nga e tërë Kosova, duke iu përgjigjur thirrjes së Bashkimit të Sindikatave të Pavarura të Kosovës (BSPK), hynë në grevë duke e pezulluar punën dhe çdo aktivitet shoqëror në Kosovë për një ditë. Kjo grevë i kishte dy kërkesa: kthimin e punëtorëve shqiptarë të larguar nga puna në kundërshtim me konventat ndërkombëtare; si dhe mospengiminin e punës së Kuvendit dhe të Qeverisë së Kosovës. Kjo grevë erdhi dy muaj pas Deklaratës Kushtetuese të 2 korrikut 1990, ditën e fillimit të vitit të ri shkollor dhe katër ditë para shpalljes së Kushtetutës së Republikës së Kosovës në Kaçanik”, ka shkruar Kurti në kujtim të kësaj dite.
Tutje, shefi në detyrë i qeverisë thotë se gjatë atij viti, autoritetet e institucioneve të sigurisë së Serbisë, i kishin helmuar mbi 7000 nxënës në Kosovë.
“Po atë vit regjimi i Serbisë e zvogëloi numrin e nxënësve shqiptarë në shkolla, duke hapur vende për vetëm një të tretën e tyre. 15,000 punëtorë shqiptarë ishin përjashtuar nga puna kurse edhe mbi 100,000 të tjerë do të përjashtoheshin në muajt në vijim. Gjatë vitit pasues edhe 130,000 punëtorë shqiptarë të tjerë që punonin në sektorin publik, do të përjashtoheshin nga puna”, shkroi tutje ai.
Kurti ka vijuar më tej duke shkruar se në korrik të vitit 1990, Serbia e kishte miratuar “Ligjin e marrëdhënieve të punës në rrethana të posaçme”, i cili parashihte që drejtori dhe zyrtari i lartë i organizatave apo ndërmarrjeve, mund të shqiptonte masa disiplinore ndaj punëtorëve pa përfillur procedura apo komisione deri edhe në largimin e tyre nga vendi i punës.
“Greva e 3 shtatorit 1990, ishte një nga aksionet më masive qytetare dhe nga aktet politike më të kulluara të rezistencës së shqiptarëve të Kosovës, ndaj regjimit të apartheidit, të instaluar nga Serbia në Kosovë, që kulmoi në pranverën e vitit 1999, me aktet gjenocidale të Serbisë ndaj shqiptarëve në Kosovë. Duke e kujtuar ndër breza rezistencën e shqiptarëve të Kosovës, në rrugën e gjatë për liri”, ka shkruar kryeministri në detyrë, Albin Kurti.
