Kryeministri i vendit, Albin Kurti, ka takuar ministren e Punëve të Jashtme, Çështjeve Evropiane, Tregtisë së Jashtme dhe Institucioneve Federale të Kulturës të Belgjikës, Hadja Lahbib, përcjell KosovaPost.
Kurti e falënderoi Lahbibin për mbështetjen që Belgjika i ka dhënë Kosovës, teksa tha se hapja e ambasadës së Belgjikës në Kosovë, sipas Kurtit, është manifestim i marrëdhënieve të shkëlqyeshme në mes dy vendeve.
“Me këtë rast, kryeministri Kurti dhe ministrja Lahbib diskutuan rreth mundësive të bashkëpunimit në fushën e ekonomisë, tregtisë, mbrojtjes e kulturës, krahas atij politik”.
“Meqë jemi në prag të Presidencës belge të Këshillit të Bashkimit Evropian, u diskutua edhe për procesin e integrimit të Ballkanit Perëndimor në Bashkimin Evropian, përkatësisht të rrugëtimit të Republikës së Kosovës në atë drejtim”, thuhet në njoftimin e kryeministrisë.
Tutje, bëhet e ditur se në takim u fol edhe për situatën e sigurisë në rajon por edhe për raportet e Kosovës dhe Serbisë, në dritën e sulmit terrorist dhe paramilitar në Banjskë të Zveçanit, që ndodhi sot dy muaj.
“Kurti e njoftoi ministren belge Lahbib për angazhimin dhe qasjen konstruktive që Kosova ka pasur përgjatë procesit të dialogut të ndërmjetësuar nga Bashkimi Evropian dhe për qëndrimin e Kosovës në takimin e fundit në Bruksel në të njëjtën ditë kur po zhvillohej edhe Samiti i Këshillit Evropian”.
“Ai ritheksoi se Kosova mbetet e përkushtuar për zbatim të plotë, të shpejtë dhe të pakushtëzuar të Marrëveshjes Bazike dhe Aneksit të saj, dhe se nënshkrimi i tyre është garanti i respektimit dhe zbatimit të tyre drejt një normalizimi të qëndrueshëm të marrëdhënieve ndërmjet Kosovës dhe Serbisë”, thuhet në njoftim.
