Kandidati i Lëvizjes Vetëvendosje për kryeministër , Albin Kurti, ka prezantuar 25 zotimet së bashku me programet e planifikuara për mandatin e ri që synon ta fitojë, pas zgjedhjeve të 9 shkurtit. Ka folur për investimet në shëndetësi, arsim, kulturë, sport, infrastrukturë, siguri e drejtësi.
Kandidati i Lëvizjes Vetëvendosje për kryeministër Albin Kurti tha se do të themelojnë Prokurorinë e re për çështje të krimit të organizuar e korrupsionit me përkrahje dhe model të vendeve që e kanë kryer me sukses këtë betejë në Evropë.
“Nuk ka asgjë më të rëndësishme për drejtësi se sa që institucioni i hetimit të jetë në nivelin e detyrës në raport me rrjetet kriminale që janë në vijimësi të organizuara kundër shtetit dhe të drejtës në tërësi”, tha Kurti.
Përveç kësaj, kandidati i Lëvizjes Vetëvendosje për kryeministër tha se do të krijojnë Zyrën për Hetime Disiplinore.
“Do të jetë një strukturë e re që garanton balancë dhe kontroll të efektshëm nëpërmjet pushteteve, duke rritur llogaridhënien e KGJK-së dhe KPK-së për veprimet e tyre. Zyra do të jetë përgjegjëse për trajtimin e ankesave e sjelljeve të papërshtatshme nga gjyqtarët e prokurorët. Procesi do të mund të iniciohet edhe ex -oficio.
Gjithashtu kreu i LVV-së theksoi se në mandatin e ardhëm do të themelojnë Gjykatën për Çështje Familjare që, sipas tij, me shpejtësi do t’i trajtojë rastet që qytetarët adresojnë në gjykata.
“Çështjet si prona, trashëgimia, dhuna në familje, divorcet e alimentacioni nuk mund ta presin dekadën për tu zgjidhur”, tha tutje ai.
Gjatë prezantimit të zotimeve, Kurti kur foli për mbështetje ndaj institucioneve të sigurisë tha se për ushtrinë do të ndajnë buxhet mbi 1 miliard euro.
“Do të avancojmë njësinë e dronëve e antidronëve për të forcuar mbikëqyrjen e gatishmërinë për tu përballur me forma të reja të rreziqeve të sigurisë. Vendi do të ketë kufij të sigurt e të siguruar me teknologji të avancuar”, tha ai.
Tjetër prioritet, Kurti ka paraqitur funksionalizimin e Fabrikës së Municioneve e zhvillimin e industrisë ushtarake të Kosovës.
“Do të zhvillojmë dronët ushtarak “Made in Kosova”.
Ndërkohë ai foli edhe për synimet që ka vendi për marrjen e statusit të vendit kandidat në BE.
“Synimi ynë është që deri në vitin 2030, vendi ynë t’i ketë përmbyllur me sukses të gjithë kapitujt për anëtarësim”.
Foli për rritje pagash. Kurti tha se paga minimale do të rritet mbi 500 euro dhe e njëjta nuk do të tatohet.
Kur foli për investime në infrastrukturë, tha se në mandatin e ri do të fillojnë me ndërtimin e hekurudhës Prishtinë-Durrës dhe do të projektojnë linjën hekurudhore që lidhë Prizrenin e Ferizajn me Gjilanin e Bujanovcin. Do të përfundojnë ndërtimin e rrugës Prizren-Tetovë, autostradën Prishtinë- Gjilan, gjithashtu do të ndërtojmë rrugën e Dukagjinit e do të vazhdojnë me ndërtimin e rrugëve Deçan- Plavë e Pejë-Rozhajë. Tha se rruga Dollc-Gjakovë e Kijevë-Zahaq do të finalizohen.
