Kryeministri i Kosovës, Albin Kurti, e ka dënuar ashpër sulmin ndaj dy qytetarëve të Kosovës i cili ndodhi pasditen e sotme në Shtërpcë të Graçanicës, transmeton Kosova Post .
Nëpërmjet një reagimi në rrjetet sociale, Kurti u shpreh thellësisht i brengosur për plagosjen e tyre.
“Njësitet relevante do të vazhdojnë hetimet deri në zbardhjen e të gjitha rrethanave të këtij akti të papranueshëm dhe të dënueshëm. Dua të siguroj të gjithë qytetarët se Policia e Kosovës është e angazhuar maksimalisht në kryerjen e detyrave të saj me qëllim të mbrojtjes së jetës dhe pronës së të gjithëve pa dallim”, shkroi Kurti.
Rastin e ka dënuar edhe ministri i Mbrojtjes i Kosovës, Armend Mehaj, i cili tha se në këtë rast është i përfshirë edhe një pjesëtar i Forcës së Sigurisë së Kosovës (FSK).
Ai tha se me rastin po merren organet e sigurisë dhe drejtësisë dhe rasti do të trajtohet sipas rregulloreve dhe ligjeve në fuqi në Ministrinë e Mbrojtjes dhe FSK-së.
“Shpreh keqardhjen më të thellë për atë që ka ndodhur në Shtërpcë. Të plagosurve u uroj shërim sa më të shpejtë. Raste si kjo janë të izoluara, por si të tilla nuk guxojnë të ndodhin. Ministria e Mbrojtës dhe Forca e Sigurisë së Kosovës mbeten të përkushtuar për t’i shërbyer qytetarëve tanë pa dallim”, shkroi Mehaj.
Së fundmi Policia Rajonale e Ferizajt, pas arrestimit të të dyshuarit A.K., shtetas kosovar i moshës 33-vjeçare, ka gjetur e më pas ka konfiskuar armën e zjarrit (pistoletë) me të cilën dyshohet se është kryer vepra penale.
“Si provë materiale është konfiskuar edhe automjeti me të cilën dyshohet se ka lëvizur i dyshuari”, njoftoi Policia.
Rasti kur dy persona, një i rritur dhe një fëmijë i moshës 11 vjeç mbetën të plagosur nga i dyshuari i cili është nën arrest, ndodhi rreth orës 3 të pasdites në fshatin Drajkovc të Shtërpcës.
Sipas Policisë, rasti ndodhi derisa i dyshuari ishte me një automjet të udhëtarëve në lëvizje që po qarkullonte nga Shtërpca në drejtim të Ferizajt dhe i cili më pas, para se të arrestohej, ishte larguar nga vendi i ngjarjes./aa
