Lidhja Demokratike e Kosovës, ka mbajtur mbledhjen e dytë të Këshillit të Përgjithshëm; ku u diskutua rreth tre pikave të rendit të ditës, fillimisht diskutim i përgjithshëm mbi gjendjen politike dhe zhvillimeve të fundit në vend, si dhe autorizimin e Këshillit të Përgjithshëm që Kryesia e LDK-së dhe kryetari Abdixhiku të vazhdojnë me veprimet parazgjedhore.
“Unanimisht Këshilli i Përgjithshëm po ashtu miratoi qëndrimin e kryetarit, Lumir Abdixhiku dhe të Kryesisë lidhur me zgjedhjet e parakohshme në vend, ku qëndrimi i Lidhjes Demokratike mbetet i njejtë. Kryeministri duhet të japë dorëheqje për dështimet e tij në çdo fushë, pastaj të bëhet shpërndarja e Kuvendit dhe krejt në fund të caktohet data e zgjedhjeve”, thuhet në njoftimin e LDK-së.
Gjithashtu në këtë mbledhje është aprovuar edhe kuota e ndarjes së nominimeve për deputetë,
“Gjatë kësaj mbledhje, Këshilli i Përgjithshëm aprovoi kuotën e ndarjes së nominimeve për listën e deputetëve, nëpër degët e Lidhjes Demokratike. Në listën e kandidatëve për deputetë, do të jenë të gjithë kryetarët e komunave të LDK-së; kjo për arsye që e djathta të jetë sa më e fuqishme në zgjedhjet e ardhshme të Kosovës të cilat nuk kanë të bëjnë vetëm me fatin e LDK-së, por fatin e Republikës dhe gjeneratave që vijnë”, thuhet tutje në njoftim.
Krejt në fund , citohet në njoftim se “LDK është e gatshme për zgjedhjet kurdo që mbahen në Kosovë, prandaj është e vetmja parti që po bën të gjitha përgatitjet dhe po vazhdon takimet me qytetarë anë e kënd vendit”./Kosova Post/
