Ministri i Bujqësisë, Faton Peci ka reaguar edhe sot, duke kujtuar denoncimin që bëri para shtatë muajsh për uzurpimin e pronave të shtetit që janë bërë në Prishtinë dhe vendbanime tjera, por që edhe pse kanë dorëzuar fakte e dëshmi, prokuroria nuk po ndërmerr asnjë veprim.
“Janë bërë më shumë se 7 muaj prej që kemi denoncuar dhe ofruar të gjitha faktet e poseduara se lokale afariste në zemër të Prishtinës, janë pronë e Ministrisë së Bujqësisë. Veprimtari që ushtrohet kundërligjshëm sepse s’ka se si të jetë ndryshe kur edhe kundërligjshëm janë ndërtuar e po në atë mënyrë vazhdojnë të funksionojnë. 700 metra katrorë! Oborr i shndërruar në depo! Vepra penale me bollëk!”, ka shkruar sot ministri Peci.
Ai ka theksuar se përveç provave të deponuara në polici e prokurori, ndihmë rreth kësaj çështje kanë kërkuar edhe nga kryetari i Prishtinës me të cilin siç thotë edhe janë dakorduar që ta ndërmarrë një aksion përmes inspektoriatit.
“Përkundër dakordimin me gjasë nuk i ka pa edhe 3 kërkesat e drejtuara përmes e-maili, që ta lirojë pronën e Ministrisë dhe t’ia kthejë titullarit. Ata që i kanë lejuar dhe mundësuar këto veprimtari janë emra të përveçëm e që prokuroria i posedon me fakte. Që nga viti 2012, janë edhe shumë përgjegjës të tjerë që pavarësisht informatave për keqpërdorime, me vetëdije të plotë nuk kanë ndërmarrë asnjë veprim”, ka thënë në reagimin e sotëm ministri Faton Peci.
