Ministri i Mbrojtjes Ejup Maqedonci, njofton se 43 kadetë të FSK-së janë duke i ndjekur studimet në objektin e Akademisë së Mbrojtjes, në të cilin objekt është investuar mbi një milion euro.
Maqedonci , thekson se në këtë formë menaxhmenti drejtues e akademik ngritë kapacitetet profesionale të Forcës së Sigurisë së Kosovës përmes shkollimit të kuadrove të reja të kadetëve në Qendrën për Studime Universitare, dhe avancimin e oficerëve në Shkollën e Oficerëve.
Tutje tha Maqedonci se “Qendra për Studime Universitare (QSU) e ndërtuar mbi katër shtylla apo programe kryesore: Programi Profesional; Programi i Udhëheqjes; Programi Akademik dhe Programi i Përgatitjes Fizike, ka për mision që të arsimojë, edukojë, trajnojë dhe inspirojë kadetët që të bëhen oficerë të cilët do të udhëheqin me shembull dhe që qëllim kryesor kanë shërbimin ndaj atdheut”.
Sipas tij, kadetët e diplomuar në Qendrën për Studime Universitare-Akademinë e Mbrojtjes janë liderët e së ardhmes.
“Të përgatitur në aspektin fizik e mendor janë të gatshëm për të udhëhequr çdo situatë në mënyrë efektive, pa marrë parasysh mjedisin ose skenarin e operacionit”, është shprehur ministri Maqedonci.
