Ministria e Drejtësisë e ka konfirmuar se ministrja Albulena Haxhiu është intervistuar me 18 janar, lidhur me rastin e zhdukjes se mostrave te Astrit Deharit.
“Po me 18 janar është intervistuar ministrja Haxhiu, lidhur me rastin e zhdukjes se mostrave te Astrit Deharit”, thuhet shkurt në përgjigjen nga Ministria e Drejtësisë dhënë për RTK-në.
Avokati i familjes Dehari, Tomë Gashi ka njoftuar se deputeti i Kuvendit të Kosovës nga radhët e Vetëvendosjes, Haki Abazi do të intervistohet nesër nga Prokuroria Speciale pas deklarimeve të tij.
Gashi ka njoftuar se ka kërkuar që ai të jetë prezent gjatë marrjes në pyetje të Abazit
“Në cilësinë e përfaqësuesit juridik të familjes Dehari sot me shkrim kam kërkuar që të marr pjesë gjatë marrjes në pyetje të tijë në Prokurori. A do të na thërras Prokuroria apo jo e marrim vesh nesër”, ka shkruar Gashi.
Kujtojmë se deputeti Haki Abazi ditë më parë tha se ekzistojnë video-incizimet ku shihet se kush i ka zhdukur mostrat e aktivistit Astrit Dehari.
Abazi gjatë një konference për media kërkoi po ashtu që prokuroria duhet të merr në pyetje edhe drejtues qeveritar.
“IML-ja është në monitorim me kamera 24 orë. Dhe thash që prokuroria duhet të marr në pyetje Albin Kurtin, Dejona Mihalin, Albulena Haxhiun, Nazlie Balaj dhe Flutura Gogaj Bajrami. Rasti i Deharit është shumë i rëndë për tu mbajtur mbi supet e qytetarëve që kërkojnë drejtësi. Dhe platforma e LVV-së ka qenë që drejtësia duhet të dal në dritë”, kishte deklaruar Abazi.
