Me duartrokitje dhe karafila të bardhë mbi arkëmort u përcoll sot për në banesën e fundit kolosi i letërsisë shqipe, Ismail Kadare.
Kadare ndërroi jetë më 1 korrik në moshën 88-vjeçare.
Qeveria shqiptare shpalli dy ditë zie kombëtare në nder të gjeniut të letrave shqipe, ndërsa sot mijëra qytetarë e personalitete të jetës publike nga Shqipëria dhe Kosova kryen homazhe në sallën e TKOB.
Pas homazheve Kadare është përcjellë nga kortezhi për në varrezat e Tufinës.
Bashkëshortja e tij Helena kërkoi ceremoni varrimi vetëm në prani të familjarëve, duke mbyllur kështu homazhet në momentin e nisjes së kortezhit.
