Ka përfundur ceremonia mortore e Papa Françeskut në sheshin Shën Pjetër, Vatikan, ku ishin të pranishëm afro 50 mijë besimtarë, mbretër dhe mbretëresha, 50 krerë shtetesh, 23 kryeministra, delegacione nga 160 vende, rreth 4000 meshtarë dhe të paktën 120 delegacione me përfaqësues fetarë nga e gjithë bota.
Arkëmorti i kreut të Kishës Katolike mbërriti nga Bazilika Shën Pjetri në Bazilikën e Shën Marisë së Madhe, ku do varroset, ndërsa qindra mijëra besimtarë (besohet deri në 1 milion) ishin të pozicionuar në trotuaret e rrugëve ku kaloi kortezhi.
Ceremonia e varrimit do të kryesohet nga kardinali Kamerlengo, Kevin Farrell, i cili do të kujdeset për çështjet e përditshme të Kishës deri në zgjedhjen e Papës së ri. Riti do të zhvillohet në mënyrë private.
Ceremonia mortore nisi në orën 10:00. Besimtarët priitën më duatrokitjen daljen e arkivolit të kreut të Kishës Katolike nga Bazilika Shën Pjetër, në shesh. Pas 2 orësh, në drejtimin e kardinalit Giovanni Battista Re, Dekan i Kolegjit Kardinalëve, ceremonia mortore përfundoi me një tjetër duatrokitje të fortë nga besimtarët në sheshin Shën Pjetër.
Procesioni i kardinalëve në Bazilikën e Shën Pjetrit shënoi fillimin e ceremonisë mortore.Arkivoli i kreut të Kishës Katolike u mbajt mbi supe nga sediarët, duke dalë nga Bazilika e Shën Pjetrit.Mbi arkivolin e Papës Françesku qëndroi i vendosur Ungjilli i hapur.
“Shpërthimi i dashurisë që kemi dëshmuar ditët e fundit pas kalimit të tij nga kjo botë në përjetësi na tregon sa shumë ndikoi papati i thellë i Papës Françesku në mendjet dhe zemrat e njerëzve”,-tha kardinali Giovanni Battista Re (Dekan i Kolegjit Kardinalëve), i cili po drejton ceremoninë mortore.
«“Të ndërtojmë ura dhe jo mure” është një thirrje që ai e ka përsëritur shpesh, dhe shërbimi i besimit si Pasardhës i Apostullit Pjetër ka qenë gjithmonë i lidhur me shërbimin ndaj njeriut në të gjitha dimensionet e tij. Në bashkësi shpirtërore me të gjithë Krishterimin, jemi këtu në numër të madh për të lutur për Papën Françesku, që Zoti ta pranojë atë në pafundësinë e dashurisë së tij. Papa Françesku kishte zakon ta përfundonte çdo fjalim dhe takime duke thënë: ‘Mos e harroni të luteni për mua’. I dashur Papa Françesku, tani ne kërkojmë prej teje që të lutesh për ne dhe që nga qielli të bekojsh Kishën, të bekojsh Romën, të bekojsh tërë botën, ashtu siç e bëre të dielën e kaluar nga ballkoni i kësaj Bazilike në një përqafim të fundit me gjithë popullin e Zotit, por gjithashtu në mënyrë ideale edhe me njerëzimin që kërkon të vërtetën me zemër të sinqertë dhe mban lart flakadan e shpresës», shtoi kardinali Re.
Sheshi Shën Pjetër ishte i mbushur në kapacitetin maksimal prej 50 mijë vetash.Vlerësohet se rreth 200 mijë persona të tjerë ndodhen tashmë përgjatë rrugës “Via della Conciliazione” dhe në rrugët hyrëse drejt sheshit.
Në ceremoninë mortore ishin të pranishëm po ashtu figura të larta të skenës ndërkombëtare politike dhe diplomatike.
Sekretari i Përgjithshëm i Kombeve të Bashkuara, Antonio Guterres, ka hyrë në Vatikan së bashku me delegacionin e OKB-së përmes hyrjes së rezervuar për autoritetet në rrugën e Stacionit të Vatikanit. Në mënyrë të veçantë është shënuar mbërritja e Presidentit të Shteteve të Bashkuara, Donald Trump, i shoqëruar nga Zonja e Parë, Melania Trump. Delegacioni amerikan ka hyrë nga Porta e Peruginos, e caktuar për autoritetet e larta ndërkombëtare. Në ceremoni është i pranishëm edhe ish-presidenti amerikan Joe Biden, i cili ka mbërritur në Sheshin Shën Pjetër për të nderuar figurën e Papës Françesku.
Ndërkohë, Kryeministrja italiane Giorgia Meloni ishte ndër të parët që mbërriti në shesh, duke përfaqësuar shtetin mikpritës të Vatikanit në një nga momentet më të rëndësishme ceremoniale të dekadës.
Po ashtu, në Vatikan ka mbërritur edhe delegacioni zyrtar i Federatës Ruse, i kryesuar nga Ministrja e Kulturës, Olga Borisovna Lyubimova, e cila do të përfaqësojë Rusinë në ceremoninë mortore, shkruan shqiptarja.com.Nga Shqipëria është presidenti Bajram Begaj, ministri i Jashtëm Igli Hasani, ministrja e Shtetit për Administratën Publike dhe Kundër Korrupsionit, Adea Pirdeni.
