Agjencia e Statistikave të Kosovës (ASK) ka publikuar statistikat e shëndetësisë për vitin 2024.
Në vitin 2024, numri i vizitave në institucionet shëndetësore, kryesisht vizitave parandaluese, është rritur në të gjitha nivelet, qofshin ato në shëndetin primar, sekondar ose edhe në atë terciar.
Tek të prekurit me sëmundje malinje dhe beninje vërehet një rënie e rasteve të reja (-12,5%), krahasuar me vitin 2023 (që ishin 4 165 raste të reja të prekura nga sëmundjet malinje dhe beninje) derisa në vitin 2024 ky numër ka rënie në 3 644 raste të reja.
Sipas rezultateve të dala nga ky publikim, numri i përgjithshëm i të punësuarve në shëndetësi në sektorin publik, në vitin 2024, ishte 14 008 të punësuar, prej tyre: mjekë specialistë (3 031); mjekë stomatologë (378); farmacistë (106); fizioterapistë (60); infermierë (7 969); bashkëpunëtorë shëndetësorë (234); dhe staf jo-mjekësor (2 230).
Në vitin 2024, numri i punonjësve shëndetësorë të licencuar në bazë të odave të profesionistëve shëndetësorë është 14 524, prej tyre: 5 656 mjekë, 3 563 infermierë, 2 522 stomatologë, 1 295 fizioterapistë, si dhe 1 488 farmacistë. Nga ky numër: 8 099 janë femra, ndërsa 6 424 janë meshkuj.
Gjatë vitit 2024, numri i institucioneve private shëndetësore të licencuara ka arritur në 2 379 sosh, prej tyre: spitale (32) dhe 2 347 institucione të tjera shëndetësore (ambulanca, poliklinika, laboratorë, kabinete etj.).
Nga gjithsej 2 379 institucioneve private shëndetësore të licencuara, numrin më të madh e përbëjnë ambulancat stomatologjike me 439 sosh; ambulanta gjinekologjike (191); qendra diagnostike (167) etj.
