Ministri i Haxhit dhe Umres, Dr. Taufik al-Rabiah, ka nisur sot një vizitë zyrtare katër-ditore në disa vende të Ballkanit Perëndimor, përfshirë Shqipërinë, Kosovën, Maqedoninë e Veriut dhe Malin e Zi, transmeton Kosova Post.
Kjo vizitë është pjesë e përpjekjeve strategjike të Arabisë Saudite për të forcuar bashkëpunimin me Ballkanin Perëndimor dhe për të përmirësuar shërbimet për ata që dëshirojnë të kryejnë umren.
Gjatë kësaj vizite, ministri do të zhvillojë takime të rëndësishme me zyrtarë të lartë, homologë fetarë, përfaqësues të shoqërisë civile dhe liderë komunitarë, për të diskutuar mënyrat për të përmirësuar shërbimet dhe për të lehtësuar proceset që lidhen me vizitat e besimtarëve nga Ballkani.
Vizita synon të theksojë angazhimin e drejtpërdrejtë të Mbretërisë në bashkëpunimin me homologët e saj në këto vende.
Kjo vizitë do të përqendrohet në përmirësimin e shërbimeve për ata që dëshirojnë të vizitojnë tokat e shenjta, duke përfituar nga teknologjitë e reja dhe platformat si “Nusuk” për lehtësimin e procedurave.
Kjo nismë është pjesë e vizionit të Arabisë Saudite për vitin 2030, që synon të rrisë numrin e vizitorëve dhe të përmirësojë përvojën e tyre shpirtërore, duke u bazuar në udhëzimet e Mbretit Salman dhe Princit të Kurorës Mohammed bin Salman për të ofruar mbështetje të plotë për “Mysafirët e Zotit”.
