Shkruan: Sali Berisha
Kongresmeni Eliot Engel, kryetar i Komisionit për Punët e Jashtme të Kongresit të SHBA dhe njeri nga avokatët më të fuqishëm të interesit të drejtë kombëtar të shqiptarëve të të gjitha kohërave, largohet pas 30 vjetësh nga Kongresi i SHBA.
Kongresmeni Engel kryesoi për shumë vite, grupin për shqiptarët në Kongresin e SHBA dhe ishte padyshim njeri prej zërave më të fuqishëm në historinë e atij Kongresi për shqiptarët në Kosovë, lirinë dhe të drejtat e tyre, mbështetës i fuqishëm i ndërhyrjes së NATO për çlirimin e Kosovës, pavarësinë e saj, dënimin e barbarive serbe ndaj shqiptarëve të Kosovës.
Nga vitet ‘90 gjer sot, kongresmeni Eliot Engel mbështeti fuqishëm zhvillimet demokratike në Shqipëri, bashkëpunimin miqësor midis SHBA dhe Shqipërisë. Kjo mbështetje nuk u lëkund as nga qendrimet zuzare të Edvin Kristaq Zografit që mbi baza korruptive zgjodhi të votojë në OKB, rezoluten jemenite në kundërshtim flagrant me miqësinë që lidh Shqipërinë me SHBA dhe interesin tonë kombëtar.
Ky mik i rrallë i kombit shqiptar i vizitoi shumë herë të dy vendet tona, Kosovën dhe Shqipërinë.
Ai është kongresmeni që unë kam takuar më shpesh në Kongresin e SHBA, në Shqipëri apo veprimtari ndërkombëtare – njohuritë, interesi dhe ndjenjat e tij miqësore si dhe mbështetja tejet e çmuar për Kosovën, Shqipërinë dhe kombin shqiptar, do të kenë mirënjohjen e pakufishme, timen dhe të çdo shqiptari.
Zoti e bekoftë mikun tonë të dashur, kongresmenin Eliot Engel, familjen dhe vendin e tij!
