Kryetari i Partisë Demokratike të Kosovës, Memli Krasniqi në 25 vjetorin e masakrës së Rezallës, kujton se aty u vranë 98 civilë shqiptarë, përcjell Kosova Post.
Ndërsa kujton me dhimbje viktimat, Krasniqi tha se edhe për këtë masakër, sikur për shumë të tjera që ka kryer regjimi gjenocidal serb, ende s’kanë dalë para drejtësisë urdhërdhënësit dhe ekzekutorët.
Ndërsa shprehet se regjimi serb nuk kurseu as fëmijët dhe as të moshuarit.
Postimi i plotë i Krasniqit në Facebook:
Burim Zabeli, 13 vjeç, po refuzonte t’i ndahej babait të tij, Xhemajlit, i cili kishte probleme me shikim. Dhe ashtu, dorë për dorë, pranë një lisi, kriminelët serbë i pushkatuan të dy.
Trupat e Burimit dhe Xhemajlit u gjetën vetëm disa vite pas vrasjes në një varr masiv në Serbi – pasi aparati kriminal shtetëror, në mënyrë të orkestruar, kishte provuar t’i zhdukë trupat.
98 civilë shqiptarë, të të gjitha moshave, u vranë mizorisht në Rezallë me 5 prill të vitit 1999.
Nuk u kursye askush. As fëmijët dhe as të moshuarit.
Edhe për këtë masakër, sikur për shumë të tjera që ka kryer regjimi gjenocidal serb, ende s’kanë dalë para drejtësisë urdhërdhënësit dhe ekzekutorët.
Lavdi e përjetshme dëshmorëve dhe martirëve të vendit tonë, mbi sakrificën e të cilëve qëndron liria dhe pavarësia e Kosovës!
