Kryetari i LDK-së, Lumir Abdixhiku, ka kujtuar sot veprimtarin e gazetarin Enver Maloku në 26-vjetorin e vrasjes së tij.
Ndërsa kujtoi veprimtarin Maloku, Abdixhiku tha se bashkë me familjen e tij e bashkëpunëtorë të partisë u mblodhën përballë portretit të tij në Murin e Nderit në Selinë Qendrore të LDK-së për të kujtuar trashëgiminë e tij.
“26 vjet më parë, në mbrëmjen e 11 janarit të vitit të lirisë, Enver Maloku u qëllua pranë banesës së tij në Breg të Diellit në Prishtinë. Atë ditë u ndërpre rrugëtimi i një gazetari vetëmohues, i një ëndërrimtari të lirisë, i një intelektuali të rrallë e të pashoq, i një adhuruesi të shkrimit, rokut, e vet shpirtit kulturor të shoqërisë sonë. Patrioti model i orëve më të rënda e bartësi i dritares informuese në lëvizjen më të madhe nacionale për liri, pavarësi e demokraci, u vra në moshën 45 vjeçare”.
“Me familjen Maloku – me Doruntinën dhe Drinin dhe me bashkëpunëtorë të Lidhjes, sot u mblodhëm përballë portretit të tij në Murin e Nderit në Selinë Qendrore të LDK-së, aty ku qëndrojnë emrat e atyre që ndërtuan themelet e Kosovës, për ta kujtuar dhe nderuar veprën dhe trashëgiminë e tij të pashlyeshme në lëvizjen kombëtare për liri, pavarësi dhe demokraci”.
Kryetari i LDK-së, tha se Maloku nuk ishte vetëm gazetar e veprimtar, por edhe frymëzim për brezat që besojnë në lirinë e shprehjes.
“Sot kujtojmë jo vetëm njeriun që dha gjithçka për Kosovën, por edhe idealet e tij që mbeten të gjalla për të na udhëzuar në ndërtimin e së ardhmes. Enver Maloku nuk ishte vetëm një gazetar dhe veprimtar i shquar i Lidhjes Demokratike dhe i lëvizjes kombëtare për liri; ai ishte një frymëzim për brezat që besojnë në lirinë e shprehjes, në fuqinë e fjalës dhe në detyrën e secilit prej nesh për t’i mbrojtur vlerat e kombit. Lavdi jetës dhe veprës së Enver Malokut!”
