Lionel Messi, Luis Suarez dhe Neymar mund të ribashkohen? “Tridenti” legjendar MSN, që dominoi futbollin europian dhe e ndihmoi Barcelonën të fitonte gjithçka në vitin 2015, duke realizuar së bashku 364 gola dhe dhënë 173 asistime, mund të rikrijohet në Miami.
Neymar, gjatë një interviste për “CNN Sport”, deklaroi: “Sigurisht, të luaja përsëri me Messin dhe Suarezin do të ishte e pabesueshme. Ata janë miqtë e mi, ende flasim me njëri-tjetrin. Do të ishte interesante ta ringjallnim këtë treshe. Jam i lumtur tek Al Hilal, jam i lumtur në Arabinë Saudite, por kurrë nuk i dihet. Futbolli është plot surpriza”.
Kur u pyet për kalimin tek Al Hilal dhe jo në MLS, Neymar shpjegoi: “Kur doli lajmi se do të largohesha nga PSG, merkatoja në SHBA ishte e mbyllur, kështu që nuk e kisha këtë mundësi. Projekti që më ofruan në Arabinë Saudite ishte shumë i mirë, jo vetëm për mua, por edhe për familjen time. Prandaj, të shkoja në Arabinë Saudite ishte opsioni më i mirë”.
Me kontratën e tij që përfundon në verën e vitit 2025, ekziston mundësia që Neymar të ribashkohet me Messin dhe Suarezin në SHBA, në vitin 2026, duke u përgatitur për Kupën e Botës, një trofe që Brazili e kërkon prej vitit 2002. Ai tha: “Kam shumë besim te kombëtarja dhe lojtarët e rinj që po dalin në pah. Është një ekip i ri, edhe pse sot nuk jemi në pozicionin ku dëshirojmë të jemi. Kemi një vit e gjysmë për t’u përgatitur dhe për t’i bërë gjërat si duhet, për ta arritur suksesin në Kupën e Botës”.
Sa i përket gjendjes së tij fizike, Neymar, 32 vjeç, ka pësuar disa dëmtime të rënda. Për herë të fundit e veshi fanellën e Brazilit në tetor 2023, kur gjatë humbjes 2-0 ndaj Uruguait dëmtoi rëndë ligamentin e kryqëzuar të përparmë dhe meniskun e gjurit të majtë. Pas një mungese njëvjeçare, ai pësoi një tjetër dëmtim në tendinën e gjurit dhe që nga ajo kohë nuk ka luajtur ndeshje zyrtare.
Për Kupën e Botës 2026, braziliani tha: “Do të përpiqem me çdo kusht, dua të jem atje. Do të bëj gjithçka për të qenë pjesë e kombëtares. E di që ky do të jetë Botërori im i fundit, tentativa ime e fundit, mundësia ime e fundit, ndaj do të jap gjithçka për të luajtur”.
Në lidhje me komentet e Ronaldos për “Saudi Pro League”, Neymar shtoi: “Niveli i saj po rritet dhe, nga ajo që shoh, është tashmë më e mirë se Ligue 1 në Francë. Natyrisht, Ligue 1 ka pikat e saj të forta; kam luajtur atje dhe e njoh mirë.
Sidoqoftë, sot, lojtarët e ‘Saudi Pro League’ janë më të mirë. Arabia Saudite më ka surprizuar pozitivisht; njerëzit, vendi, qytetet, kultura. Është një vend në rritje të vazhdueshme dhe do të presë Kupën e Botës më 2034. Do të jetë e diçka e jashtëzakonshme”.s.n.
