Kryeshefi ekzekutiv i Korporatës Energjetike të Kosovës (KEK), Gramos Hashani sot e ka vizituar për urime kryetarin e Komunës së Obiliq, Halil Thaçi me të cilën biseduan për projektet e përbashkëta që rrisin mirëqenien e banorëve të kësaj komune.
Hashani duke i uruar Thaçit suksese në detyrë e re në krye të Komunës së Obiliqit, tha se pas shumë dekadash KEK ndodhet në fazë strategjike për rritje të prodhimit dhe siguri në furnizim.
“I uroj sukses dhe vendimmarrje në të mirë të qytetarëve të Obiliqit. Ne si KEK kemi shumë projekte strategjike që po hyjmë në këtë fazë pas shumë dekadave më në fund po fillojmë disa projekte që kanë më rrit prodhimin, kanë me rritur sigurinë e furnizimit dhe kanë me zgjatur jetëgjatësinë e këtyre termocentraleve. Por, çka është më e rëndësishmja për Komunën e Obiliqit edhe komponentën ambientale, kemi me modernizua. Ne po ndikojmë edhe në kompenentën në përmirësimin e cilësisë dhe jetës së qytetarëve përmes projekteve që i kemi për modernizim dhe rritje të kapaciteteve”, tha ai.
Hashani pas takimit përmendi edhe projektet kyçe që e lidhin KEK-un me Obiliqin, për çka tha se do ta dyfishojnë buxhetin për projektet në komunitet.
“E kemi parkun solar fotoëoltaik mbi 100 megaëat në të cilin do të investojmë dhe Kompania Gjermane kërkuam mbështetje institucionale në aspektin e pëlqimeve mjedisore, lejeve ndërtimore dhe procedurave tjera administrative për t’u siguruar që këto projekte po ecin në kohë dhe pa vonesa sepse janë projekte strategjike…. KEK e ka përgjegjësinë sociale ndaj rrethinës dhe komunës që i ka edhe operimet e saj dhe e njoftova që ne do ta dyfishojmë buxhetin që kemi për projekte për komunitetin”, tha ai.
Kryetari i Obiliqit, Halil Thaçi teksa falënderoi Hashanin për vizitë, tha se si komunë do të jenë bashkëpunues më Korporatën Energjetike të Kosovës (KEK) në projektet që janë në të mirë të qytetarëve.
“E falënderoj për angazhimin të KEK në lokalitetet tona e në veçanti për kujdesin që e ka për banorët e Obiliqit… faleminderit për kontributin që po e bëni jo vetëm për Komunën e Obiliqit, por për gjithë Kosovën në furnizimin me energji elektrike. Sigurisht ne si komunë do t’i rrimë afër KEK për çdo gjë që ajo ka nevojë do t’i shtyjmë përpara shumë projekte madhore që janë në të mirë të vendit tonë”, tha ai.
Hashani sot ishte në vizitë edhe te kryetari i Fushë-Kosovës, Valon Prebreza. /KosovaPress/
