Disa organizata joqeveritare në Prishtinë kanë bërë homazhe në nderim të liderit të opozitës ruse, Alexei Navalny, i cili vdiq ditë më në burg në Rusi.
Ndezja e qirinjve u bë para Zyrës Ndërlidhëse të Federatës Ruse në kryeqytet, ku ishte vendosur edhe foto e Navalnyt.
Këto homazhe u organizuan nga The Geopost në Kosovë, dhe shoqëria civile.
Duke e quajtur Navalnyn fener shprese për miliona njerëz, Kaltrina Kamberi, nga shoqëria civile tha se mizoria ndaj tij nuk ishte vetëm një sulm ndaj Navalnyt por mbi thelbin e lirisë dhe demokracisë.
“Kjo ngjarje nënvizon rrezikun që Rusia paraqet jo vetëm për qytetarët e saj por edhe për sigurinë globale. Modeli i represionit të brenshëm dhe agresionit të jashtëm përbën një rrezik të qartë për të gjithë ata që e vlerësojnë paqen dhe demokracinë. Në këtë kontekst, qëndrimi i perendimit ndaj Rusisë dhe përfaqësuesve të saj bëhet jashtzakonisht i rëndësishëm” tha Kamberi.
Ajo theksoi se Perëndimi duhet që të rishikojë edhe mbështetjen ndaj presidenti serb, Aleksander Vuçiq, i cili sipas saj, është përfaqësues i Rusisë në Ballkan.
“Qasja e perëndimit ndaj Vuçiqit të Serbisë, i cili shpesh shihet si përfaqësuese i Rusisë në Ballkan ka nevojë për vlerësim. Mbështetja e liderëve të tillë, vetëm inkurajon regjimet që nuk hezitojnë të shtypin disidencën ose të kërcënojnë stabilitetin ndërkombëtar”, deklaroi ajo.
Politikani opozitar rus, ka vdekur teksa ndodhej në burg, sipas një njoftimi nga departamenti lokal i Shërbimit Federal të Burgjeve në rajonin e Jamalo-Nenetsit.
Navalny, një kritik i zëshëm i Putinit, është mbajtur në burgun rus prej vitit 2021 nën akuza që janë cilësuar nga shumë si të nxitura politikisht.
Në gusht, ai u shpall fajtor për themelimin dhe financimin e një organizate ekstremiste, gjë të cilën e ka mohuar gjithmonë, dhe u dënua me 19 vjet burgim shtesë.
