Shkruan: Besa Nuredini
Në Kosovë po zhvillohet një teatër politik ku opozita, duke u fshehur pas Kushtetutës, në fakt po e shkel atë me të dyja këmbët. Neni 64 dhe 67 i Kushtetutës janë të qartë: Kuvendi duhet të ketë dy nënkryetarë nga komunitetet joshumicë, një nga komuniteti serb dhe një nga komunitetet tjera. Rregullorja e Kuvendit po ashtu e përcakton këtë ndarje. Kaq. Asgjë më shumë, asgjë më pak.
Ndarja e votimit në dy procese nuk është shkelje, është zbatim i pastër i Kushtetutës.
Por opozita po e shndërron Kushtetutën në alibi. Kur u votua Emilija Rexhepi, opozita nuk pati problem, e votuan me dy duar, ndaras, jashtë çdo “pakete” me kandidatin serb. Askush nuk foli për shkelje. Mirëpo kur erdhi radha e Nenad Rashiq, papritur Kushtetuta u bë “shenjë e kuqe”. LDK nuk mori pjesë fare, PDK e AAK abstenuan, duke e lënë Kuvendin pa nënkryetar serb, gjë që është vetë shkelje e Kushtetutës. Pra, kur iu konvenon, e përdorin Kushtetutën, kur jo, e shpërfillin.
Ndërkohë Lista Serbe tri herë radhazi propozoi Igor Simiqin, i cili mori vetëm 10 vota pro, 56 kundër dhe disa abstenime. Kushtetuta është e qartë: një kandidat nuk mund të kandidohet më shumë se tri herë. Megjithatë Lista Serbe refuzoi të propozojë kandidat tjetër, dhe kur të njejtit refuzuan të propozojnë emër tjetër, Basha aktivizoi mekanizma alternativ komform rregullores se kuvendit: përdorimin e shortit për zgjedhjen e kandidatit nga komuniteti serb.
Dhe ironia më e madhe? Adem Hoxha, deputeti goran. AAK e përjashtoi nga grupi parlamentar sepse votoi pro Listës Serbe. Por i njëjti deputet ia dha nënshkrimin Listës Serbe që ta çonte rastin në Gjykatën Kushtetuese. Pa votën e tij, ata nuk do ta arrinin numrin prej dhjetë deputetësh. Pra, nga njëra anë patriotizëm i rremë, nga ana tjetër bashkëpunim i fshehtë me Listën Serbe. Ky është kulmi i hipokrizisë.
]
Të gjitha këto e bëjnë të qartë një gjë: Vetëvendosje nuk ka shkelur Kushtetutën. Përkundrazi, është opozita ajo që po e përdor Kushtetutën si pretekst, duke e instrumentalizuar sipas interesit të momentit. Qëllimi i tyre i vetëm është të faktorizojnë Listën Serbe, sepse pa të, opozita kurrë nuk ka arritur të konstituojë Kuvendin e as të formojë qeveri. Ky është realiteti politik që duhet ta dijë opinioni publik: opozita nuk po mbron Kushtetutën, opozita po e mbron Listën Serbe.
