Një pjesë e opozitës parlamentare në Serbi deklaroi sot se formimi i një qeverie kalimtare është e vetmja mënyrë për të dalë nga kriza politike pas muajve të tërë protestash studentore dhe qytetare. Opozita propozon një qeveri të bazuar në një konsensus të gjerë shoqëror, ndërsa kryetarja e Kuvendit, Ana Brnabiq, e konsideron këtë propozim jokushtetues.
Deputetët e disa grupe opozitare vlerësuan se një qeveri kalimtare është zgjidhja e vetme për tejkalimin e krizës në të cilën ndodhet Serbia që nga rrëzimi i strehës në Novi Sad, ku humbën jetën 15 persona.
Përfaqësuesit e opozitës besojnë se është e nevojshme një “Qeveri e Besimit të Popullit” për të stabilizuar vendin dhe për të siguruar kushte të drejta zgjedhore. Mirosllav Alleksiq, lider i Lëvizjes Popullore të Serbisë, theksoi se opozita ka arritur një nivel të lartë pajtimi për formimin e një qeverie kalimtare.
“Deri tani kemi arritur një marrëveshje të gjerë dhe kemi një propozim të përbashkët, që tregon se opozita para jush ka një bashkëpunim funksional. Nga sot fillon afati për formimin e qeverisë kalimtare, edhe pse ne besojmë se ky proces ka nisur më herët, që nga dorëheqja e Vuçeviqit,” tha Alleksiq.
Kuvendi i Serbisë konfirmoi më 19 mars dorëheqjen e kryeministrit Milosh Vuçeviq, duke kaluar qeverinë në mandat teknik për 30 ditë, aq sa është afati për formimin e ekzekutivit të ri. Kryetarja e Kuvendit Ana Brnabiq njoftoi se procesi i formimit të qeverisë së re fillon më 20 mars, ndërsa afati përfundimtar është 18 prilli.
Bashkëkryetarja e Frontit të Gjelbër i Majtë, Bilana Djorgjeviq, theksoi se “Qeveria e Besimit të Popullit” do të kishte një mandat të qartë, sigurimin e kushteve për përmbushjen e kërkesave studentore dhe organizimin e zgjedhjeve të ndershme. “Do të funksiononte deri në nëntë muaj dhe do të kishte detyra konkrete,” tha ajo.
“Sa i përket përbërjes, partitë opozitare parlamentare, lëvizjet shoqërore dhe universitetet në bllokadë, si propozues në emër të qytetarëve të lirë të Serbisë, propozojnë një kandidat jopartiak për kryeministër, për të cilin do të arrihet pajtim mes të gjithë aktorëve në Kuvend,” deklaroi Gjorgjeviq.
Sipas saj, është e nevojshme krijimi i një konsensusi të gjerë shoqëror për këtë qeveri kalimtare.
“Kjo është një thirrje për një marrëveshje të gjerë shoqërore mbi Qeverinë e Besimit të Popullit dhe për kandidatët për kryeministër dhe ministra, të cilët, përmes profesionalizmit të tyre dhe mbështetjes së gjerë, mund të ndihmojnë në rikthimin e besimit në institucionet tona,” shtoi ajo.
Kryetarja e Kuvendit dhe zyrtarja e lartë e SNS-së, Ana Brnabiq, hodhi poshtë propozimin e opozitës, duke e cilësuar atë si jokushtetues.
“Me çfarë baze? Me cilin ligj, me cilën Kushtetutë? Një propozim i tillë nuk është vetëm jokushtetues, por është drejtpërdrejt në kundërshtim me Kushtetutën,” deklaroi Brnabiq.
Presidenti i Serbisë, Aleksandar Vuçiq gjithashtu ka refuzuar mundësinë që “opozita të imponojë” një qeveri kalimtare, duke theksuar se vendimet “merren në Kuvend, jo në rrugë”.
“Vendimet merren në zgjedhje, jo në protesta. Ose do të formohet një qeveri sipas vullnetit të shumicës, ose do të shkojmë në zgjedhje,” tha Vuçiq./rtk
