Sot në të gjitha shkollat e Kosovës ora e parë mësimore iu kushtua Epopesë së UÇK-së.
Në një lidhje direkte në emisionin “Mirëmëngjesi Kosovë” në RTK, Xhejlane Grajçevci, mësuese në shkollën fillore “Nazim Gafurri” në Prishtinë, teksa u tregonte nxënësve se si ka ndodhur e gjithë ngjarja në Prekaz, veçoi se “Ademi Jashari nuk u dorëzua, ai rezistoi me të gjithë familjen e vet për këtë liri të cilën ne sot e gëzojmë dhe duhet t’i jemi shumë falënderues dhe shumë mirënjohës Adem Jasharit dhe të gjithë ushtarëve të Ushtrisë Çlirimtare të Kosovës (UÇK)”.
Në ligjëratën para nxënësve, ajo u shpjegoi atyre se Adem Jashari mban titullin Komandant Legjendar i Ushtrisë Çlirimtare të Kosovës dhe se titulli heroi Kosovës iu dha në vitin 2008.
“Adem Jashari dhe sakrifica e tij heroike u bënë simbole të pavarësisë të cilën sot të gjithë e gëzojmë”, tha mësuesja Xhejlane Grajçevci para nxënësve.
Pas ligjëratës së mësueses, ora mësimore vazhdoi me poezi nga nxënësit kushtuar epopesë, pastaj të gjithë nxënësit kënduan marshin e UÇK-së.
Grajçevci tha se këto shpjegime për nxënësit janë shumë të rëndësishme.
“Edhe pse, fatbardhësisht, nuk kanë qenë pjesë e luftës, janë aq shumë kureshtarë të dinë për historinë e luftës që ka ndodhur në Kosovë. Janë kureshtarë të dinë se si kemi ardhur te liria, cilët kanë qenë ata që kanë sakrifikuar aq shumë për këtë liri”, tha ajo dhe shtoi se në kuadër të aktiviteteve sa i përket Epopesë, janë munduar t’i vizitojnë edhe vendet ku kanë ndodhur këto ngjarje.
“Emocioni i tyre ka qenë shumë më i madh kur i kanë parë ato vende dhe kemi folur më shumë për epopenë”, shtoi Grajçevci.rtk.
