Ushtruesja e detyrës së presidentes Vjosa Osmani, ka përkujtuar heroin tonë kombëtar Gjergj Kastrioti Skënderbeun në 553 vjetorin e vdekjes.
Osmani tha se Skënderbeu ishte digë e fortë e mbrojtjes së Evropës, dhe ikonë e unitetit tonë.
Tutje ajo tha se Gjergj Kastrioti Skënderbeu është frymëzim i rezistencës dhe i luftës për liri në të gjitha periudhat.
“Skënderbeu është frymëzim i rezistencës dhe i luftës për liri në të gjitha periudhat. Por mbi të gjitha, ai mbetet modeli unik i përbashkimit të shqiptarëve dhe si i tillë do të kujtohet përherë! Qoftë i përjetshëm kujtimi për kryestrategun tonë!”, ka shkruar Osmani në Facebook.
Postimi i plotë:
Sot mbushen 553 vjet nga vdekja e heroit tonë Kombëtar Gjergj Kastrioti- Skënderbeu.
Ai ishte digë e fortë e mbrojtjes së Evropës, që pati guximin në të gjitha përballjet e tij. Përveç se një luftëtar i paepur, Gjergj Kastrioti mbetet edhe ikona e unitetit tonë. Në fillim të marsit të vitit 1444, në Kuvendin e Lezhës, ai realizoi të parin bashkim politik të princërve shqiptarë të kohës, me të cilin iu hapë rruga themelimit të shtetit mesjetar shqiptar.
Skënderbeu është frymëzim i rezistencës dhe i luftës për liri në të gjitha periudhat. Por mbi të gjitha, ai mbetet modeli unik i përbashkimit të shqiptarëve dhe si i tillë do të kujtohet përherë!
Qoftë i përjetshëm kujtimi për kryestrategun tonë!
