Presidentja e Kosovës, Vjosa Osmani, në deklarimin para mediave pas Samitit, ka treguar se presidenti serb, Aleksandër Vuçiq iu drejtua Samitit me ofendime e arrogancë me tentimin, siç tha Osmani, që ta prishte takimin.
Por, presidentja tha se në fund arritën që deklaratën ta miratonin me uninimitet.
“Sikurse edhe në takime tjera të Brdo- Brijunit, ndoshta në një dozë më të madhe, Vuçiqi i Serbisë iu drejtua Samitit me ofendime e arrogancë me tentimin që ta prishte takimin, por arritëm në fund që ta miratojmë deklaratën e përbashkët me unanimitet dhe natyrisht për çdo propagandë që Vuçiqi synonte të prezantonte para pjesëmarrëseve, ne si Republikë kishim argumentet tona të fuqishme, argumentet në anën e së drejtës, argumente që janë fuqizuar e mbështetur edhe nga e drejta ndërkombëtare nëpërmjet mendimeve të Gjykatës Ndërkombëtare të Drejtësisë”, tha Osmani.
Tutje e para e shtetit të Kosovës ka treguar se brenda atij takimi, presidenti serb kishte ankesa për paktin që Kosova, Shqipëria e Kroacia e kanë arritur në fushën e mbrojtjes.
Ajo tha se janë aleanca mbrojtëse nga rreziqet që vijnë nga të tjerë, në rastin e Kosovës, nga Serbia.
“Si Kosovë jemi pro bashkëpunimit rajonal, por në të njëjtën kohë do ta mbrojmë interesin tonë shtetëror, sovranitetin, integritetin territorial. Edhe pse Vuçiqi kishte ankesa për paktin tonë Kosovë-Shqipëri-Kroaci në fushën e mbrojtjes, ai mori rikonfirmimin tonë të përbashkët që kjo shënon një bashkëpunim të përbashkët që ka për qëllim mbrojtjen tonë. Përgjigjja ime ishte që në tërë historinë e ekzistencës tonë si komb asnjëherë nuk e kemi sulmuar askënd, asnjëherë nuk e kemi pushtuar askënd, gjithnjë e kemi mbrojtur vetveten dhe integritetin territorial. Aleancat tona janë aleanca mbrojtëse, për të na mbrojtur nga rreziqet që vijnë nga të tjetër, në rastin tonë, për Kosovën rreziku vjen nga Serbia, dhe natyrisht që ne do të vazhdojmë ta fuqizojmë ushtrinë tonë me qëllim që të mbrohet çdo centimetër e territorit të Republikës dhe liria e fituar me mund e sakrificë”, deklaroi tutje Osmani.
Presidentja pati kritika për BE-në që ende vazhdon ta mbajë Kosovën nën masa.
“Përkundër të gjitha reformave Kosova ende mbetet në sanksionet e BE-së, për të cilat askush nga shtetet anëtare nuk është i gatshëm të jap një arsye pse janë ende në fuqi edhe pse të gjitha kushtet janë plotësuar e njëkohësisht edhe pse aplikacioni ynë është dorëzuar për anëtarësim qysh në vitit 2022, deri tani, për shkak të disa shteteve anëtare as nuk është mandatuar Komisioni Evropian për tu marrë më çështjen e statusit të kandidatit për Kosovën. Kjo na sjellë të konkluzioni që procesi nuk është i bazuar në merita, por ka zhvillime politike, konsiderata vetanake që shtetet anëtare nganjëherë i marrin parasysh për të përkrahur një shtet apo jo”, deklaroi Osmani.
E para e shtetit të Kosovës tha se në takim kërkoi mbështetjen e Sllovenisë e Kroacisë si dy shtete anëtare të BE-së e shtetet fqinje që ta mbështesin e të jenë zëri i Kosovës që të hapet rruga drejt BE-së.
