Në një tjetër seancë të jashtëzakonshme do të mblidhen deputetët e Kuvendit të mërkurën, e treta brenda në më pak se një javë.
Këtë e ka bërë të ditur shefi i deputetëve të PDK-së, Abelard Tahiri në një konferencë për media, ndonëse nuk bëri të ditur orën se kur do të mbahet ajo.
Ai tregoi se debati do të jetë i përqendruar në dy pika, për borxhet e kompanive ambalazhuese të ujit dhe publikimet e mesazheve që pretendohet të jenë bisedat ndërmjet koordinatores së komiteteve të Lëvizjes Vetëvendosje, Dejona Mihalit dhe ish-kryeshefit të KEK-ut,Nagip Krasniqi.
“Ajo çka kemi lexuar dje, del se një person siç është Dejona Mihali është një person që në një formë apo tjetër e udhëheqë sektorin energjetik në vendin tonë. Unë kam disa pyetje. Kush është Dejona Mihali që duhet ta udhëheqë Korporatën Energjetike të Kosovës, Korporata më e madhe në vend njëkohësisht kompania publike më e madhe. Unë po ua rikujtoj juve njëkohësisht qytetarëve të Kosovës se Korporata Energjetike e Kosovës qarkullon diku 150 milion euro në vit përfshirë këtu edhe pagat e punëtorëve. Kush është Dejona Mihali që duhet ta udhëheqë kompaninë energjetike të vendit. Në bisedat që kemi parë, pra ajo na përcakton edhe kur duhet të ketë reduktime e kur jo”, tha ndër të tjera në këtë konferencë Tahiri i PDK-së
Ai tha se prokuroria e hetuesit duhet t’i japin përgjigje kësaj çështje meqë, siç tha, sektori energjetik të jetë në duar të një personi jozyrtar është e rrezikshme për vendin dhe cenon sigurinë kombëtare.
“Për dy vite KEK-u ka shpenzuar rreth 100 milion euro në kontrata njëburimore, cili është roli i Dejona Mihalit në kontratat njëburimore. Këto janë çështje që qoftë prokurori apo hetuesit duhet t’i japin përgjigje. Unë konsideroj se të jetë sektori energjetik në duar të një personi jozyrtar është e rrezikshme për vendin e cenon sigurinë kombëtare”, tha tutje ai.
Tahiri i ka bërë thirrje Lëvizjes Vetëvendosje që të jenë të pranishëm në këtë seancë.rtk.
