Në përfundim të ndeshjes Benfica-Barcelona 4-5, ndodhi një përleshje në tunelin e dhomave të zhveshjes, teksa të dyja skuadrat po largoheshin nga fusha.
Fillimisht pati fyerje ndaj Raphinhas dhe braziliani u kundërpërgjigj.
Lojtarët e të dyja skuadrave u përfshinë, duke bërë që të ndërhynte sigurimi i stadiumit.
Ishte vetë Raphinha që shpjegoi çfarë ndodhi: “Unë jam një person që i respektoj të gjithë. Kur po dilja nga fusha, disa njerëz më fyen. Iu ktheva fyerjet, e di që nuk duhet ta bëj këtë. Të gjithë u tensionuam.
Lojtarët e Benficas preferuan të më fyenin dhe unë jam një person që nuk e mbaj asgjë brenda. Respektoj cilindo nëse më respekton, nëse jo, nuk qëndroj i heshtur kur më fyejnë. Është normale pas një përfundimi të tillë ndeshjeje”.
Lojtari brazilian nuk deshi t’i jepte më shumë rëndësi asaj që ndodhi dhe tha se është në momentin më të mirë të karrierës, duke mos hyrë më thellë tek incidentet.
As Eric Garcia dhe as Hansi Flick nuk dëshiruan të komentonin mbi përplasjen fizike, duke pretenduar se nuk dinin asgjë për të.
Nga ana tjetër, Raphinha nuk hezitoi të fliste hapur për arbitrat. Kur u pyet nëse i pëlqenin më shumë gjykimet në La Liga apo në Champions, braziliani e tha hapur mendimin e tij: “Nëse them atë që mendoj, ndoshta nuk do të luaja më në La Liga”.s.n.
