Aleanca e Atlantikut të Veriut ka ngritur alarmin e pranisë së trupave të Koresë së Veriut në Ukrainë. 32 vendet anëtare të NATO-s thanë në një deklaratë të përbashkët se vendosja e trupave të Koresë së Veriut është një “zgjerim i rrezikshëm” i mbështetjes së vendit për luftën e Rusisë kundër Ukrainës.
Anëtarët e aleancës ushtarake paralajmëruan se “thellimi i bashkëpunimit ushtarak” midis Rusisë dhe Koresë së Veriut “ndikon thellë sigurinë euro-atlantike, me implikime edhe për Indo-Paqësorin”. Australia, Japonia, Zelanda e Re, Koreja e Jugut dhe Ukraina gjithashtu mbështetën deklaratën e NATO-s.
Më herët, Sekretari i Përgjithshëm i NATO-s, Mark Rutte, tha se trupat e Koresë së Veriut janë dërguar në Rusi dhe se njësitë ushtarake të Koresë së Veriut janë vendosur në rajonin e Kurskut. Presidenti i Ukrainës, Volodymyr Zelenskyy, tha të enjten pas një takimi me Rutte se “është e nevojshme një përgjigje më vendimtare nga vendet perëndimore ndaj rolit të ri të Koresë së Veriut në luftën Rusi-Ukrainë”.
Ndërkohë, Presidenti rus Vladimir Putin është gati të diskutojë çështjen e Ukrainës me Donald Trump, por kjo nuk do të thotë se ai është i gatshëm të ndryshojë kërkesat e Moskës, paralajmëroi Kremlini. Zëdhënësi i Putinit, Dmitry Peskov, tha se “Presidenti nuk ka thënë kurrë se qëllimet e operacionit special ushtarak po ndryshojnë. Përkundrazi, ai ka thënë vazhdimisht se ato mbeten të njëjta”, tha Peskov, shkruan A2CNN.Putini më 14 qershor përcaktoi kushtet e tij për t’i dhënë fund luftës: Ukrainës do t’i duhet të heqë ambiciet e saj në NATO dhe të tërheqë të gjitha trupat e saj nga i gjithë territori i katër rajoneve të pretenduara nga Rusia. Ukraina e hodhi poshtë këtë, duke thënë se do të ishte e barabartë me kapitullimin dhe Presidenti ukrainas Volodymyr Zelenskiy ka paraqitur një “plan fitoreje” që përfshin kërkesat për mbështetje shtesë ushtarake nga Perëndimi.
