Wolfgang Petritsch, ish-përfaqësuesi i Lartë në Bosnje dhe Hercegovinë, në një intervistë për N1 ka komentuar zhvillimet aktuale politike në BeH, duke paralajmëruar për pasoja të rënda nëse politika vazhdon të udhëhiqet nga vizione ndarëse dhe retorikë nacionaliste.
Petritsch tha se liderët si Dragan Çoviq dhe Milorad Dodik po udhëhiqen nga logjika e sundimit autokratik në pjesë të vogla të Bosnjës, sesa nga ideja për një shtet funksional dhe të përbashkët.
“Dodik së shpejti do të jetë një sundimtar autokrat i një vendi pa njerëz, ndërsa Çoviq ende ëndërron për një Herceg-Bosnë të ndarë,” tha Petritsch, duke shtuar se të dy po luftojnë kundër një armiku fantazmë, ndërkohë që të rinjtë po largohen masivisht nga vendi.
Ai theksoi se lidhja mes Dodikut dhe Çoviqit ka bazë të përbashkët: qëllimi për të sunduar në territore të izoluara, edhe nëse kjo do të thotë rrënim i Bosnjës dhe Hercegovinës si shtet.
“Të rinjtë po largohen sepse çdo ditë dëgjojnë nga politikanët e tyre se janë të kërcënuar. Kush do të qëndrojë në një vend ku çdo ditë të thonë se je i rrezikuar? E gjithë kjo është propagandë,” theksoi Petritsch.
Ai kritikoi edhe lidershipin e boshnjakëve kroatë, duke rikujtuar se gjatë negociatave në Dayton, presidenti i atëhershëm kroat Franjo Tudjman ishte më i interesuar për kthimin e territorit të Kroacisë sesa për të drejtat e kroatëve të Bosnjës.
“Nuk ka arsye që boshnjakët kroatë të këmbëngulin për një entitet të veçantë, pasi si popull konstituiv janë të përfaqësuar në të gjitha institucionet e vendit,” tha ai.
Petritsch apeloi që fokusi të zhvendoset nga çështjet nacionaliste në drejtim të zhvillimit ekonomik dhe mundësive për të rinjtë. Ai kërkoi që politikanët të ndalojnë retorikën e përçarjes dhe të fillojnë të ndërtojnë një vend ku të rinjtë kanë arsye për të qëndruar dhe për të ndërtuar të ardhmen e tyre.
“Në vend të secesionit, duhet të investohet në arsim, ekonomi dhe mundësi të barabarta për të gjithë qytetarët,” përfundoi ai.g.e.
