Ministri i Punëve të Jashtme të Serbisë, Ivica Daçiq, ka reaguar pas votimit të djeshëm në Këshillin e Evropës për pranimin e Kosovës. Daçiq është shprehur se janë befasuar nga disa vende dhe ka theksuar se dhe qëndrimi i tyre do të jetë reciprok ndaj atyre vendeve që nuk kanë respektuar integritetin sovran.
Daçiq ka thënë se votimi i djeshëm do të ndikojë edhe në qëndrimet e mëtejshme të Serbisë.
Ai vuri në dukje se është shkelur statuti i Këshillit të Evropës, sepse siç thotë ai, diçka që nuk është shtet nuk mund të jetë anëtare e Këshillit të Evropës.
“Nga ana tjetër, interpretimi ligjor i të njëjtit njeri është i ndryshëm sot në krahasim me 10 vjet më parë”, thekson Daçiq.
Ndër të tjera zyrtari serb shprehet se është e qartë se Gjermania i ka premtuar kryeministrit të Kosovës Albin Kurti se do ta shpërblejnë për “konstruktivitetin”.
“Këtu tregohet se kush është i preferuari i disa vendeve perëndimore, në këtë rast vendet e QUINT-it. Ata thyen një sërë rregullash, Islanda e kundërshtoi për një kohë të gjatë. Ai donte t’ia linte Letonisë për presidencën e ardhshme. Më pas kërkuan takim urgjent me një pikë të vetme të rendit të ditës Ai Komiteti i Ministrave u takua vetëm me një pikë të rendit të ditës dhe nuk ka ndodhur që të mblidhet në një javë kur u mbajt Asambleja Parlamentare e Këshillit të Evropës”, tha Daçiq.
Ai përmend se Kurti i ka kushtëzuar me gjoja konstruktivitet dhe se dëshiron të diskutojë për Asociacion, që është “qesharake, hipokrite, e vrazhdë”.
“Në vetë diskutimin nuk foli askush, vetëm Shqipëria që e propozoi, u vjen turp për atë që propozuan, u vjen turp dhe u rrethuan, sepse ndoshta nesër do të propozohet një pjesë e një vendi në Këshillin e Evropës”, thotë Daçiq.
Ai thekson se Mali i Zi së paku mund të ishte përmbajtur.
“Duhet të veprojmë në mënyrë reciproke edhe këtu. Mali i Zi votoi për pranimin e Kosovës. Atyre do t’u duhet vota jonë në një moment, sigurisht që nuk do të mund ta numërojnë“, tha Daçiq.
