Prishtinë–Prokuroria Speciale e Republikës së Kosovës njofton se pas zhvillimeve të hetimeve, ka ngritur aktakuzë në Gjykatën Themelore në Prishtinë – Departamentin Special, ndaj dy të pandehurve Bedri Shabani dhe Muharrem Qerimi, të cilët ngarkohen për spiunazh.
Sipas PSRK-së, Qerimi ngarkohet edhe për armëmbajtje pa leje.
“Për dy të pandehurit B.Sh dhe M. Q. ekziston dyshimi i bazuar mirë se secili veç e veç, me veprimet e tyre e kanë kryer veprën penale “Spiunazhi’’ nga neni 124 paragrafi 3 i KPRK–së, kurse, i pandehuri M.Q edhe veprën penale “Mbajtja në pronësi, kontroll ose posedim i paautorizuar i armëve” nga neni 366 par. 1 të KPRK-së”, thuhet në njoftim.
Ndër të tjera aty thuhet se prokurori i shtetit nga Prokuroria Speciale i ka propozuar gjykatës që pas shqyrtimit gjyqësor dhe administrimit të provave, të njëjtit t’i shpallë fajtorë dhe t’i dënojë sipas Kodit Penal të Republikës së Kosovës.
“Po ashtu, prokurori i rastit, ka kërkuar nga gjykata që të pandehurve tu vazhdohet masa e paraburgimit deri në përfundimin e shqyrtimit gjyqësor, ngase ende ekzistojnë kushtet ligjore për vazhdimin e masës së tillë”, thuhet në fund.
Ndryshe, Prokuroria Speciale e Kosovës e Republikës së Kosovës (PSRK) në qershor 2024 kishte njoftuar se pas zhvillimit të hetimeve disamujore, në bashkëpunim me Policinë e Kosovës dhe Agjencinë e Kosovës për Inteligjencë (AKI), ka zhvilluar bastisje në dy lokacione të Kosovës dhe ka arrestuar Bedri Shabanin dhe Muharrem Qerimin, nën dyshimin për kryerjen e veprës penale “Spiunazhi”.
Kurse, Policia e Kosovës (PK) përmes raportit 24 orësh, kishte bërë të ditur se në shtëpitë e dy të dyshuarve që u arrestuan për spiunazh, u gjetën dhe sekuestruan dokumente të ndryshme, kompjuter, telefona, USB, DVR, kaseta, armë, municione, maska, gasmaska ushtarake dhe shumë dëshmi të tjera.
