Kryeministri i Shqipërisë, Edi Rama ka ironizuar ish-kryedemokratin Lulzim Basha, teksa ishte në një komunikim live në Facebook. Për këtë ka reaguar deputeti Basha, i cili kohë me parë ka drejtuar Bashkinë e Tiranës.
Rama gjatë fjalës së tij, teksa i përgjigjej me ironi komentit të një qytetari, ka thënë se Basha ishte ëmbëlsira e të gjithëve dhe jo rastësisht sipas tij, nga të gjitha premtimet kur ishte kryebashkiak i Tiranës, bëri vetëm tortën për 100 vjetorin e Pavarësisë..
Shefi i qeverisë shqiptare duke iu drejtuar publikisht Bashës, ka thënë se kishte nostalgji për të dhe sa herë e kujtonte ndjente një ‘përvëlim’.
“Me thënë të drejtën, një omëlsinë, një omëlsinë kemi pasur. Edhe se di si do bëjmë që ta kemi prap. Lul Bashën kemi pasur omëlsinë. Omëlsina jonë ka qenë Lul Basha, e të gjithëve. Ndaj jo rastësisht edhe tortën e bëri Lul Basha. Nga të gjitha ato që tha vetëm një tortë ka bërë. O Lul ku je se sa herë më kujtojnë ty, kam një nostalgji, një përvëlim”, ka thënë Rama.
Për këtë ka reaguar Lulzim Basha. Përmes një postimi në rrjetet sociale, Basha është shprehur se sipas kryeministrit, kush nuk vjedh është i paaftë.
Basha thekson se në kohën kur ai drejtonte Bashkinë e Tiranës, nuk kishte projekte korruptive, por investime reale për qytetin dhe qytetarët. Sipas tij, nuk kishte kulla për pastrim parash apo afera të dyshimta, por projekte për rrugë, shkolla, çerdhe dhe një Tiranë më të pastër.
Basha më tej shprehet se Rama është kryeministri që ka hyrë në histori për futjen e krimit në qeveri, për bashkëpunimin e tij për të marrë pushtetin dhe për nivelin më të lartë të korrupsionit në Evropë.
