Pothuajse çdo i dyti kandidat në autoshkolla bie në provimin e testit në Gjermani. Një në tre nuk e kalon testin në automjet Tani do të ketë ndihma të reja!
“Këtu, në parking, mund të shihni se si reagon makina,” thotë instruktori i vozitjes Thomas, duke treguar ekranet e mëdha. “Këtu ndërroni marshin si në një automjet me marshe automatike.” Ai ia jep këto udhëzime Marias, një studente në autoshkollën Flix. Në simulatorin e drejtimit, Maria po nget makinën në një parking. Ajo thotë: “Gjithçka lëviz vërtet sikur të ishe jashtë. Ndihesh sikur je në një automjet”.
Në Gjermani, edhe të moshuarit, shoferë mbi 70 vjeç, duhet të testohen për të parë nëse janë të aftë akoma për të drejtuar makinën.
Thomas e shoqëron Marian në simulator me humor dhe këshilla. Stërvitja këtu është një shtesë për mësimet në drejtimin e makinës në rrugë. Imituesi, sipas tij, është vërtet i mirë. Në autoshkollën e tij, ngasja në një simulator është falas. “Kjo u kursen para pjesëmarrësve, pasi duhen mesatarisht 25 orë vozitje. Aftësitë dhe njohuritë testohen këtu edhe më shumë.
Thomas thotë se shumë kandidatë po dështojnë gjithnjë e më shumë në teste. “Kandidatët e kalojnë ditën në shkollë deri në katër ose pesë pasdite dhe më pas vijnë në mësimin e vozitjes. Kokat e tyre në fakt janë plot me gjëra të tjera. Ata nuk kanë koncentrimin e duhur për mësim. Pastaj u duhen shumë orë vozitje, ose dështojnë në provim”.
Ka shumë që bien disa herë
Sipas të dhënave nga Shoqata e Inspektimit Teknik (TÜV), përqindja e atyre që dështojnë në testet teorike apo në testin e vozitjes së automjetit mbetet e lartë. 45 për qind dështojnë në testet teorike ndërsa 37 për qind dështojnë në vozitje. Sipas statistikave aktuale, nuk është e pazakontë qëkandidatët t’i nënshtrohen testit të shoferit disa herë.
Richard Gebelt nga Shoqata për Mbikëqyrjen Teknike thotë: “Nëse dështoni në provimin e parë, zakonisht e keni të vështirë përsëritjen e provimit”. Sa herë që një kandidat dështon në një provim, kjo rrit ngarkesën mendore dhe shkakton kosto shtesë”.
Për të ulur përqindjen e përsëritjeve të provimeve, është e nevojshme, sipas kësaj Shoqate të krijohen kushte më të mira për marrjen e patentës, që do të përfshinte edhe verifikimin elektronik të nivelit të gatishmërisë së kandidatit për të marrë provimin.
Kjo tashmë po zbatohet në autoshkollën Flix në Këln, thotë instruktori i vozitjes Thomas. Një aplikim thotë se duhet të keni të paktën 70 për qind përgjigje të sakta në test – vetëm atëherë kandidati mund t’i nënshtrohet testeve reale. /DW
