Shoqata e Vullnetarëve për Zjarrfikje dhe Shpëtim të Kryeqytetit, ka mbajtur sot kuvendin e parë themelues.
Kryetari i Komunës së Prishtinës, Përparim Rama, ka thënë se është kënaqësi që po krijohet kjo shoqatë vullnetarësh.
“Sot e ndiej një krenari, sepse me themelimin e Shoqatës së Vullnetarëve për Zjarrfikje dhe Shpëtim të Kryeqytetit, po i vendosim themelet e një force për mbrojtjen e pasurive dhe jetës së qytetarëve. Krahas rritjes së popullsisë dhe zgjerimit të infrastrukturës, kërkohet të jemi në gatishmëri edhe për situata emergjente. Nuk është rastësi që shtetet i vendosin pikërisht vullnetarët. Në Francë gjysma e ndërhyrjeve kryhet nga vullnetarët”, ka pohuar Rama.
Ndërsa, komandanti i zjarrfikësve të Prishtinës, Mal Gashi, tha se kjo ide është jetësuar falë mbështetjes së kryetarit Përparim Rama.
“Që nga viti 2012 kemi pasur idenë për të krijuar Shoqatën e Vullnetarëve për Zjarrfikje dhe Shpëtim, por deri më tani nuk ka lëvizur shumë dhe ne kemi shumë ide, por nëse nuk jetësohen ato ide, ato mbesin vetëm në letër. Nëse nuk do ta kishim vullnetin e kryetarit Përparim Rama dhe drejtorit Lulzim Fushtica, nuk do të mund ta realizonim këtë ide. Kjo nuk është vetëm ide, por është mision që do ta kemi përpara vetes”, deklaroi Gashi, shkruan telegrafi.Ndryshe, për herë të parë është themeluar Shoqata e Zjarrfikësve Vullnetarë të Kryeqytetit.
