Shtetet e Bashkuara të Amerikës u ka bërë thirrje qytetarëve të sajë të largohen nga Libani “me çfarëdo bilete që gjejnë”, pasi po rritet frika se lufta në Lindje të Mesme mund të zgjerohet. Edhe Mbretëria e Bashkuar, Suedia, Franca, Kanadaja dhe Jordani po ashtu kanë lëshuar paralajmërime të ngjashme.
BBC shkruan se Irani është zotuar për “hakmarrje të ashpër” kundër Izraelit, të cilin e fajëson për vrasjen e kreut politik të Hamasit, Ismail Haniey.
Haniyeh humbi jetën në një sulm ajror në Tehran të mërkurën. Vrasja e tij erdhi vetëm disa orë pasi Izraeli vrau komandantin e Hezbollahut, Fuad Shukr, në një sulm ajror në Bejrut.
Dyshohet se Hezbollahu me bazë në Liban, një grup i mbështetur nga Irani, mund të luajë një rol të rëndësishëm në çdo hakmarrje të tillë, e cila nga ana tjetër mund të shkaktojë një përgjigje serioze izraelite.
Hezbollahu ka lansuar disa raketa në qytetin Beit Hillel në veri të Izraelit rreth orës 00:25 të dielën me kohë lokale. Në pamje në rrjete sociale shihet sistemi izraelit i mbrojtjes ajrore “Iron Dome” duke i shkatërruar raketat. Nuk është raportuar për ndonjë viktimë. Forcat ajrore izraelite janë kundërpërgjigjur duke goditur shënjestra në jug të Libanit.
Të dielën dy persona janë vrarë në një sulm me thikë në qytetin izraelit Holon. Policia ka thënë se sulmuesi është “neutralizuar”.
Ambasada e SHBA-së në Liban të shtunën ka theksuar se qytetarët amerikanë që vendosin të qëndrojnë në Liban duhet të “përgatisin një plan emergjence dhe të jenë të gatshëm të strehohen për një periudhë të gjatë kohore”.
U raportua se disa linja ajrore kanë pezulluar dhe anuluar fluturimet dhe shumë bileta janë shitur tashmë te disa kompani që ende vazhdojnë qarkullimin në Liban. Por, nga Ambasada është thënë se ka opsione për t’u larguar nga Libani, shkruan BBC.
Pentagoni ka thënë se do të vendosë anije shtesë luftarake dhe aeroplanë luftarakë në rajon për ta ndihmuar Izraelin të mbrohet nga sulmet e mundshme të Iranit dhe “satelitëve” të Iranit.
Mbretëria e Bashkuar ka thënë se po dërgon personel shtesë ushtarakë, konsullorë dhe zyrtarë të forcave kufitare për të ndihmuar me çdo evakuim, por u ka bërë thirrje qytetarëve që të largohen sa më parë nga Libani. Forcat Ajrore të Britanisë kanë vënë në dispozicion helikopterë transporti për evakuime të mundshme.
Sekretari i Jashtëm i Britanisë, David Lammy, ka deklaruar se situata rajonale mund të përkeqësohet me shpejtësi.
Në prill, Irani kishte lansuar një sulm ajror në Izrael duke përdorur 170 dronë, 30 raketa lundruese dhe 110 raketa balistike. Sulmi ishte hakmarrje për sulmin izraelit ndaj Konsullatës iraniane në Damask të Sirisë. Shumë druhen se hakmarrja e Iranit do të jetë e një përmase të tillë.
Në një telefonatë të premten me shefin e Politikës së Jashtme të BE-së, Josep Borrell, ushtruesi i detyrës së ministrit të Jashtëm të Iranit, Ali Baqeri Khani, ka thënë se Irani padyshim do ta përdorë të drejtën legjitime për ta dënuar Izraelin.
Kryeministri i Izraelit, Benjamin Netanyahu, ka paralajmëruar izraelitët se “ditë sfiduese qëndrojnë para nesh”. “Kemi kërcënime nga të gjitha anët. Ne duhet të përgatitemi për çdo skenar”, ka thënë Netanyahu, shkruan BBC.
