Disa komuna të Kosovës janë përfshirë nga vërshimet pas reshjeve të shumta të shiut dhe borës që ranë gjatë natës së mbrëmshme, por edhe ditëve të kaluara.
Sasia e madhe e reshjeve ka bërë që disa rrugë në disa komuna të përfshihen nga uji, e në disa pjesë të tjera uji ka arritur të depërtojë edhe në disa shtëpi.
Drejtori ekzekutiv i Asociacionit të Komunave të Kosovës, Sazan Ibrahimi, ka thënë për Telegrafin se situata nuk është e mirë.
Ai ka shtuar se kryetarët e komunave janë në terren për të mbikëqyrur situatën.
“Të gjithë kryetarët në zonat e prekura së bashku me shtabet komunale dhe me drejtoritë komunale janë duke punuar pa ndalur në mënyrë që situata të tejkalohet. Kryetarët e komunave janë në terren së bashku me qytetarët e komunave përkatëse. Situata po shihet që nuk është e mirë”, u shpreh Ibrahimi.
Deri më tani situatë më e rëndë nga vërshimet paraqitet në komunën e Rahovecit ku janë evakuuar disa familje, po ashtu edhe në Gjilan situata nuk është e mirë.
Reshjet probleme kanë shkaktuar edhe në komunat Fushë Kosovë, Drenas, Lipjan, Klinë etj.
