Shefi i Grupit Parlamentar të AAK-së, Besnik Tahiri, ka reaguar për gjendjen e rrugëve magjistrale në Podujevë, Gjakovë, Mitrovicë e Gjilan, duke kritikuar kështu qeverisjen aktuale, përcjell Kosova Post.
Ndërsa përmend tri rrugët që po kryhen punime, Tahiri thotë se këto rrugë janë bërë të rrezikshme si rrugët në Kandahar.
“Rruga për Podujevë është bërë si rrugë për Kandahar, e rrezikshme, e dëmshme për njerzë e vetura dhe gati e patejkalueshme. Pothuajse në të njëjtën gjendje janë edhe rrugët për Gjakovë, Mitrovicë e Gjilan, pra në të katër anët e Kosovës rrugët janë të bllokuara, ndërsa lavdet nuk ndalen”, ka thënë Tahiri.
Ndërsa flet për gjendjen e rrugëve deputeti Tahiri i’a kujton qeverisjes aktuale se duhet të punoj pak më shumë e të përfundojë ndonjë rrugë këta muajt e fundit para zgjedhjeve, për siç tha arsyetim të qeverisjes.
“Mirë është që në këta muajt që i kanë mbetur kësaj qeverie të përfundojë ndonjë rrugë dhe të del me diçka konkrete në këtë 4 vjeçar. Përndryshe, po shihet që ky kabinet qeveritar është i pazot me punu diçka të hajrit për vendin”, është shprehur Tahiri.
