Qytetarët e Kosovës gjatë të dielës, 9 shkurt iu drejtuan kutive të votimit për të zgjedhur qeverinë e ardhshme të vendit.
Nga 1 milion e 970 e 944 persona që kishin të drejtë vote, në këto zgjedhje kanë marrë pjesë rreth 40 për qind.
Menjëherë pas përfundimit të procesit të votimit, KQZ nisi me numërimin e votave për subjektet politike dhe publikimin e rezultateve në uebfaqen e tyre, Mirëpo pas disa minutave faqja e KQZ-së u përball me disa probleme teknike.
Lidhur me këtë zëdhënësi i KQZ-së, Valmir Elezi ka thënë për Telegrafin se në orët e hershme të mëngjesit është tejkaluar ky problem.
“Ju njoftojmë se në orët e hershme të mëngjesit është tejkaluar problemi për publikimin e rezultateve preliminare për subjektet politike nga procesi i votimit më 9 shkurt.
Të dhënat po shfaqen pa ndonjë pengesë në platformën e rezultateve dhe deri më tani janë procesuar rreth 90% e vendvotimeve”, ka thënë Elezi.
Ai ka shtuar se mediat dhe qytetarët mund t’i referohen këtyre të dhënave që po shfaqen në platformën elektronike.
“Gjatë gjithë natës, KQZ ka verifikuar rezultatet që kanë arritur në platformën elektronike duke i krahasuar me të dhënat nga formularët e rezultateve të subjekteve politike që janë plotësuar në vendvotime pas numërimit të fletëvotimeve”, ka thënë Elezi
